Print this page

Horta: Atu Sai Lideransa Di'ak Tenke Estuda Laos Sosa Diploma

By October 05, 2020 12188
Eis-Prezidente da Republika (2007-2012), Dr. Jose ramos Horta hatoo hela ninia intervensaun iha Seminar ne'ebe realisa husi Rotary Youth Leadership Awards Timor Lorosa'e (RYLA-TL) ho tema ‘Lead to Change’ iha Ai Lok laran Dili (5/10) Eis-Prezidente da Republika (2007-2012), Dr. Jose ramos Horta hatoo hela ninia intervensaun iha Seminar ne'ebe realisa husi Rotary Youth Leadership Awards Timor Lorosa'e (RYLA-TL) ho tema ‘Lead to Change’ iha Ai Lok laran Dili (5/10) Foto Tempo Timor

Tempotimor (Dili)-Laureadu Nobel da Pas José Ramos Horta husu ba foin-sa’e sira atu estuda maka’as hodi sai lideransa di’ak iha futuru no labele hatoman an ho sosa de’it diploma.

Eis Prezidente Repúblika ne’e hato’o kestaun ne’e bainhira sai oradór iha serimonia ne’ebé realiza husi Rotary Youth Leadership Awards Timor Lorosa'e (RYLA-TL) ho tema ‘Lead to Change’.

Horta hatete, atu sai lideransa ne'ebé di'ak tenke estuda, la'ós estuda bosbosok no sosa de'it diploma maibé la hatene halo servisu.

"imi eskola tenke ba universidade ne'ebé hetan akreditasaun no iha kualidade ne'e, i labele buka de'it mak sosa diploma," dehan Horta iha seminariu Ailok-Laran, Segunda (5/10).

Nia hatutan, sai lideransa ne'ebé di'ak presiza haree tuir mós lideransa ezemplar sira hanesan Lere Anan Timur, Kay Rala Xanana Gusmão, no sira seluk ne’ebé sofre durante iha ai-laran.

"Ha’u koñese, ha’u rona sira-nia sakrifisiu ne'ebé sira halo i la lakon esperansa luta ba libertasaun, ba maun Xanana mós, laos luta de’it, depois de indepedensia maibé desizaun saida mak di’ak ba atu halo ba fronteira maritima ba Timor Gap," dehan nia.

Tan ne’e, nia apela ba joven sira atu aproveita didi’ak tempu hodi estuda, labele gasta tempu no oportunidade sira ne’e liu leet de’it.

"Kadavez Australia, Korea do Sul, sei presiza ema, joven sira atu ba servisu iha ne'eba, tanba sosieade ne'e ita bolu aging society, maibe ita tenke hatene hadi'a eletresidade, hadi'a karreta, hatene komputador, kanalisasaun, O hetan servisu lalais i selu di'ak tebes, mais o lori o nia diploma sosa, ema la simu, tanba servisu la hatene."

Horta mós husu ba governu tenke tau-matan maka'as ba juventude liu husi edukasaun ne'ebé ho kualidade.

Nia mós fó ideia ba Ministériu Saúde atu halo programa espesial ida ba eskola sira hodi halo checkup ba saude estudante sira iha eskola sira.

“Ne’e idea ida ba PM, favor haree ho ministériu saude ho doutor sira oinsa halo programa espesial ba eskola hotu-hotu hodi halo checkup ba estudante sira, tanba dala-barak juventude iha problema ba saude mak barak,” dehan nia.

Rate this item
(7 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items