Tuir Jeronimo, hanesan funsionariu públiku ne’ebé hamahan an iha estadu, tenke hala’o nia funsaun hodi serbisu, la’os halimar facebook.
"Dala-barak ha'u nota tan katak ita mai laos halo serbisu loloos, maibé ita mai mak (update) status facebook, mak lorloron rame ho status, bainhira ita la gosta ema ida ita (halo) status, bainhira ita problema ho ita-nia maluk balun ita (halo) status, ita la halo Komunikasaun, ne'e laos funsionariu publik, ida ne’e di’ak liu ita hela iha uma,” dehan Ministru ne’e bainhira sai inspetor iha serimonia hasa’e bandeira RDTL iha palasiu governu, Segunda (05/10).
Nia hatete, funsionariu públiku mai ho nia funsaun atu halo serbisu, tan ne’e durante oras serbisu nian tenke halo duni serbisu, laos update status iha facebook.
Tan ne’e, nia husu ba Diretór Jeral sira hotu atu supervijiona nia funsionariu sira atu mai serbisu duni, laos halo fali buat seluk.
"Husu de'it bá ita hotu no mós bá Diretór sira atu hahu supervijiona, akompaña membru tomak karik seidauk hala'o nia knar loos hanesan funsionariu públiku tama ona iha sistema ida nia laran tenke uza sasan sira tuir regra sistema nian laos halo tuir nia hakarak,” nia husu.