Hanesan públiku hatene, molok ne’e governu liu husi ninia rezolusaun númeru 16/2013 deside hodi taka grupu arte marsial tolu hanesan Persaudaraan Setia Hati Terate (PSHT), Kera Sakti (IKS-PTL) no Kmanek Oan Rai Klaran (KORK).
Maske nune’e, iha ona politika balun atu reativa hikas atividade grupu tolu ne’e, no daudauk ne’e prosesu rejistu la’o hela iha KRAM.
Maibé, molok grupu 3 ne’e hetan ninia legalidade no rekoñesimentu husi governu, membru husi instituisaun defeza no seguransa proibi atu envolve an.
“Jeralmente ita la bandu membru PNTL atu ba treinu arte marsiais hanesan agora daudaun membru barak loos mak depois de oras serbisu sira tuir hela no durante rekrutamentu mós ubrigatoriu tenke treinu hanesan Taekwondo, Judo, Aikido, no Karate,” dehan vise Ministru Interior foin lalais.
Nia hatutan, maibé ba grupu arte marsial ne’ebé governu bandu no taka, membru PNTL labele envolve ona.
Vise MI ne’e dehan, iha rezolusaun governu númeru 16/2013 iha artigu 17 númeru 1 hatete “proibidu atu fó kualker transmisaun kona-ba armas brankas ba ema ne’ebé laiha lisensa atu uza”, signifika katak membru instituisaun defeza no seguransa labele envolve an.
Aleinde ne’e, nia hatutan, iha rezolusaun governu nú. 5/2015 koalia kona-ba comprimisio de quebra juramento prestado arte marsiais, hatete, membru PNTL ho FFDTL labele envolve iha grupu arte marsial ne’ebé governu bandu.
“Iha mós Lei Disiplinar PNTL ne’ebé orienta sira tenke kumpre sira-nia dever mak artigu 8 númeru 1 katak elementu PNTL nia dever jeral mak atu haburas komunidade nia konfiasa, no iha artigu 12 kona-ba dever de obediência, iha alinea ‘a’ hatete mós katak ‘kumpre regulamentus no instrusaun relativu ho serbisu’,” nia informa.