Primeiru Ministru ne’e dehan, nia nu’udar Xanana nia Vise durante tinan 17 nia laran, tan ne’e nia koñese didi’ak Xanana liu ema sira ne’ebé daudauk ne’e ‘tabele hela’.
"Señor Xanana ha’u (sai) ninia wakil 17 anos, ha’u koñese liu ita-boot sira tuur iha ne'e, koñese nia di’ak liu ita-boot sira hotu, entaun ha’u-nia apelu reforsa fali katak ne'e tempu par ita hamutuk," dehan PM Taur durante diskusaun ba proposta OJE 2020 iha PN, Sesta (02/10).
Tan ne’e, nia hatete, durante ukun tinan 10 nia laran, Xanana la halo sala, maibé ema sira ne’ebé haleu nia hodi lidera no jere instituisaun sira mak sala.
"Ha’u lakohi hatudu liman ba ita-boot sira, tanba ne'e la'os ha’u-nia abitu durante tempu naruk ne'ebé hau servi Timor, tanba prinsipiu ne'ebé orienta ha’u mak ‘iha tempu susar nia laran ita mate hamutuk, iha tempu di’ak nia laran ita basa liman hamutuk’.”
“Tanba, se karik ha’u uza hanesan ita-boot sira, primeiru vitima mak CNRT, tanba ukun tinan 10, ha’u la fó sala ba ha’u-nia maun Xanana, fó sala ba sira hotu ne'ebé haleu nia hodi lidera no dirize tinan 10 nia laran,” deklara nia.
Tanba ne'e, PM Taur husu ba hotu-hotu, iha tempu ne'ebé nasaun hasoru krize atu di’ak liu hamutuk ajuda malu hodi rezolve problema sira ne'ebé nasaun hasoru.
"Iha momentu sira kuandu pais tama iha krize ne'e mak tempu loloos ita hamutuk i ha’u espera ita-boot sira hotu iha korajen parke halo ajusta i Parlamentu iha ona esperensia," dehan nia.
