Maske apoiu maibé, Eis Prezidenti parlamentu nasional ne'e hateten atu hasa'e kresementu ekonomia presija tenpu naruk tanba osan ne'ebé investe tenki serkula.

Deputadu bankada opozisaun ne'e hatete, bainhira IV guvernu konstitusional iha tinan 2009 halo pakote referedum no nia inpaktu ho durasaun tenpu naruk mak foin senti.

"Ha’u senti kestaun atu ita rekopera ekonomia ne'e laos buat fasil ida," dehan Hugo ba www.tempotimor.com iha Parlamentu nasional Dili, Kinta (1/10).

Hugo akresenta, empase politika inventadu ne'ebé halo iha 2017 mak provoka situasaun ekonomia too agora entaun kuandu ohin loron mehi atu halo lalais rekoperasaun ekonomia bele maibe laos fasil.

Hugo hatutan, Tanba ekonomia intrope tiha husi empase politika inventadu 2017 todan liu tan kuandu ho korona tama, país hotu halo pakote rekoperasaun ekonomia.

"Tenki iha inisiativas halo i ami hanesan opozisaun apoiu total tanba ne'e boas pratikas iha país hotu ne'ebé infrenta inpaktu mai husi covid-19," tenik Hugo.

Deputadu CNRT ne'e hatete, Guvernu tenki kreativas no iha inisiativas hodi hadia ekonomia iha Timor-Leste tanba situasaun ekonomia dadaun ne'e insertaja i todan tebes ba setor privadu i ne'e mosu hahu kedas iha 2017 laos deit inpaktu husi corona ne'ebé foin hahu iha marsu 2020.

"Fahe hahan ne'e kuartu prazu deit para halo povu labele hamlaha mais atu rekopera ekonomia total ne'e tenki liu husi investementu iha setor privadu nian inklui kria obra hanesan loke estrada," dehan Hugo.

Entertantu governu liuhusi Konsellu Ministru aprova ona atribuisaun sesta bázika ne'ebé aprezenta husi ministru koordenadór asuntu ekonómiku atu rekupera ekonomia iha rai-laran liuhusi dalan apoiu ba família sira inklui produtór agríkola. Sesta bázika rasik sei atribui iha fulan-Novembru no Dezembru, ne'ebé nia montante fiksa ona to’o US$ 25.