FONGTIL Fó Kuitadu Ba Deputadu PN

Uma Fukun Parlamentu Nasional Uma Fukun Parlamentu Nasional Foto Arkivu

Tempotimor (Dili) - Relasiona ho ezijénsia bankada Kmanek Haburas Unidade Nasionál Timor Oan (Khunto) nian kona-ba deputadu lejizlatura dalima presiza iha formasaun ba laptop, maka Forum Organizasaun La'ós Governu Timor-Leste (FONGTIL) fó kuitadu tanba deputadu sira utiliza uma fukun hanesan sentru formasaun komputador.

"Ha'u hanoin ne'e ita kuitadu loos. Loloos ema sira kuandu ba deputadu tenke hatene buat ne'e, tanba era teknolójia ne'e la'ós ba tiha deputadu mak foin treinu fali komputadór, ne'e ita preokupa" Diretór Ezekutivu FONGTIL, Daniel Santos do Carmo, iha Palasiu Prezidensial, Bairru-pite, Kuarta (30/9).

FONGTIL mós deskonfia dalaruma deputadu balun la hatene uza e-mail.

"Ita mós deskonfia, dala-ruma sira mós servisu eletronika hanesan e-mail ne'e laiha karik, parese sira iha númeru whatsapp no ID facebook, maibé dalaruma e-mail mós laiha, entaun ne'e problema boot," nia dehan.

Nia afirma, deklarasaun ne'e la'ós buat di'ak ida, maibé hamonu kredibilidade orgaun daruak iha Estadu Timor-Leste nian.

"Reprezentante povu ne'e buat todan ida, tanba ne'e buat báziku ida hanesan ne'e la presiza halo deklarasaun tan, maibé loloos ne'e ko'alia oinsa uza internet hodi hatene besik liu saida mak povu enfrenta iha terenu," nia dehan.

Iha fatin hanesan, Inocencio Xavier husi Asean Justice and Rights dehan, deputadu sira tenke hetan duni formasaun, tanba deputadu balun husi ai-laran mak mai.

"Loos duni, ita-nia deputadu sira la'ós ema treinadu, maibé ema polítiku, balun kaer kilat de'it, depois hetan fiar hodi sai deputadu, entaun sira laiha prosesu natoon atu loke ka taka laptop," nia dehan.

Nia akresenta, tékniku sira iha duni obrigasaun atu fasilita deputadu sira, liuliu sira ne'ebé presiza duni.

"Sira ne'ebé tinan 24 iha ai-laran, maibé sira ne'ebé hela iha sidade mak lahatene komputadór ne'e mak problema. Maibé sira ne'ebé kaer kilat de'it ne'e extraordináriu duni para sira tékniku ne'e fasilita formasaun ba sira, la'ós ba ketik de'it, maibé tenke hanorin sira para oinsa asegura segredu orgaun soberanu daruak nian," nia katak.

Nia afirma, la'ós deputadu sira ne'ebé husi ai-laran de'it mak iha problema, maibé deputadu balun iha liur sibuk mak projeitu, futu manu, depoia hetan konfiansa polítika, entaun problema hotu ba komputadór.

Ho realidade ne'ebé mosu dadaun iha Parlamentu Nasionál (PN) ne'e Inocencio husu partidu polítiku sira, halo kaderizasun ba figura partidu sira, nune'e bainhira hetan fiar husi povu tenke hatene ona utiliza fetamentu sira ne'e.(*)

    

Rate this item
(0 votes)
Last modified on Friday, 02 October 2020 19:14
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.