Naimori hato’o kestaun ne’e relasiona ho deklarasaun Angela foin lalais ne’e ne’ebé husu ba autoridade seguransa atu kaptura no investiga ulun boot partidu KHUNTO ne’e.
"Ángela Freitas ne'e ema la normál, loos ka lae. Durante ne'e ita hatene katak Ángela ne'e stress hela, ita ba preokupa fali nia ko'alia ne'e kona-ba saida nian," dehan Naimori hafoin partisipa iha reuniaun Konsellu Estadu ba estensaun Estadu Emerjensia iha Palasiu Prezidensial, Bairo-pite, Kuarta (30/09).
Tuir Naimori, Angela moras mental tanba la tau an hanesan lideransa politiku ida ne’ebé di’ak.
"Moras mentál tanba nia la hatuur aan hanesan lideransa di'ak ba nasaun ida ne'e, so soran de'it, so destroi de'it, ida ne'e signifika katak la normál," nia dehan
Iha fatin ketak, Angela ne’ebé hetan konfirmasaun husi jornalista www.tempotimor.com via telefone, duun Naimori mak la normal.
"Nia (Naimori) mak la normál,” dehan Angela.
Tuir Angela, Konselleiru Masimu partidu KHUNTO mak tenke halo ezame konsensia ba nia an rasik tanba kaer ukun maibé laiha kapasidade.
“Nia (Naimori) tenke halo interpretasaun ba ha'u-nia lia-fuan ne'e no tenke halo ezame de konxiénsia ba nia aan rasik, tanba ukun laiha kapasidade ne'e krime," dehan Angela.
Portavoz ne'e afirma, iha nasaun demokrátiku presiza ema ne'ebé iha kapasidade mak ukun, la'ós ema ne'ebé krime organizadu mak ukun.
Tuir Ángela, la’os de’it Naimori mak laiha kapasidade, maibé Partidu KHUNTO laiha kapasidade atu ukun Timor-Leste.