Sujestaun husi Jerasaun Foun Manatuto: Lider Istoriku sai Husi Partidu Politiku

Foto hamutuk Eis Prezidente Kay Rala Xanana  Gusmao, Dr. Jose Ramos Hirta, Taur Matan Ruak, eis Primeiru Ministru Mari Alkatiri no atual Prezidente da Republika Dr. Francisco Guterres Lu Olo iha 2013 iha palasiu Prezidensial Foto hamutuk Eis Prezidente Kay Rala Xanana Gusmao, Dr. Jose Ramos Hirta, Taur Matan Ruak, eis Primeiru Ministru Mari Alkatiri no atual Prezidente da Republika Dr. Francisco Guterres Lu Olo iha 2013 iha palasiu Prezidensial Foto Suplai

Tempotimor (Manatuto)-Reprezentante husi jerasaun foun iha Munisipiu Manatuto sujere ba lider istoriku sira atu lalika inklina ba Partidu Politiku, tanba bazeia ba realidade impase politika ne’e la konsege rezolve tan de’it diferensia politika entre lider hirak ne’e.

Kordenador Sub-komite 12 Novembru Munisípiu Manatuto, Artur da Silva hatete, diverjensia politika entre lider istoriku sira, liu-liu Xanana ho Alkatiri mak to’o ohin loron halo TL moris iha impase politika nia laran.

Tan ne’e, nia husu ba laureadu Nobel da Pas, José Ramos Horta atu sai mediador ba lider istoriku sira atu bele hamosu konsensu nasionál hodi hakotu impase politika ne'ebé TL hasoru.

"Ami haree ne'e todan la halimar, ita ko'alia kona-ba sustentabilidade RDTL, agora bele ou lae Dotor José Ramos Horta hanesan Laureadu Nobel ba Paz konvoka enkontru entre ita-boot (lider istoriku) sira hodi hamosu konsensu nasionál, liu-liu dezentendimentu ne'e ha’u haree figura sentral rua, Dotor Mari Alkatiri ho Maun Boot Xanana Gusmão, bele ou lae liga ba asuntu estadu, interese nasionál ne'e, imi tuur hamutuk?," Artur hato’o ninia sujestaun ne’e bainhira partisipa iha seminariu nasionál ida iha Munisípiu Manatuto, Tersa (29/09).

Atu evita situasaun hanesan ne’e mosu beibeik iha futuru, tuir nia, di’ak liu lider istoriku sira sees an husi partidu politiku no tama iha Konsellu Veteranus hodi kontrola de'it governu.

"Se bele karik imi na'in 5 ou 6 ne'e lalika tama iha partidu, imi tama de'it iha Konsellu veteranus atu kontrola estadu ou governu, se imi tama iha partidu politiku nasaun ne'e mak sai hanesan ne'e,” dehan nia.

Ba kestaun ne'e, Eis Prezidente Republika José Ramos Horta hatete, nia to’o ohin loron la tama ba partidu politiku.

"Ha’u la hatene ita-boot temi ami, kuitadu ha’u nein partidu ida iha, ohin ha’u mai ita-boot sira lubuk ida iha ne'e, maibé ha’u hatene ita-boot sira mai la'os atu rona ha’u, mai tanba Xanana nia naran, sira hatene Xanana atu mai, baibain ha’u mai na'in 2 ou 3 mak mai hemu kafe, ha’u nein partidu ida iha, balun hatete ha’u tabele ba ida ne'e no ne'eba, ha’u nunka falta partidu ne'ebé de'it halo enkontru," dehan Horta.

Rate this item
(0 votes)
Last modified on Tuesday, 29 September 2020 16:57
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.