Ema lubuk ida mak hamriik haleu, entre ema hirak ne'e, iha mós membru governu na'in tolu ne'ebé prepara an hela atu koa fita.

Sai ona hanesan toman ida, bainhira projetu ida ne'ebé governu finansia ka apoiu konklui ona ninia konstrusaun, sei iha serimonia inaugurasaun. Ho nunee, ohin, membru governu nain 3 mak marka prezensa hodi inaugural Baraka kiik ida ne'e.

Tuir observasaun jornalista www.tempotimor.com, iha serimonia inaugurasaun nee hetan partisipasaun husi Vise Ministru Interior Antonio Armindo, Vise Ministru Obras Públika Nicolau Lino Freitas, no Sekretariu Estadu Formasaun Profisional no Empregu Alarico do Rosario. Marka prezensa mós Komandante Jeral PNTL, Komisariu Faustino da Costa.

Tuir informasaun, edifisiu ho naruk metru 11 no luan metru 4 ne'ebé kompostu husi sala baibain 2, sela 2 no haris-fatin 1, ne'e sei utuliza hanesan postu seguransa.

Iha serimónia inagurasaun nee, vise Ministru Interiór dehan, membru governu na'in tolu mak mai, tanba iha ligasaun.

"Sim, membru governu sira mai, tanba iha ligasaun, ida Ministériu Obras Públika iha ligasaun, Ministru Interiór no SEFOPE mak inisiadór," deha António Armindo iha Kuartel Jerál PNTL Kaikoli, Tersa (29/9).

Nia mós husu ba membru OPS atu kuidadu no uza fatin ne'e ho didi'ak.

"Husu ba ita-nia OPS atu uza no kontinua kuidado fatin nee ho didi'ak no responsabilidade. Atu nunee bele halao servisu, tau-matan no fó seguransa ba ita-nia komunidade," dehan António iha ninia diskursu.

Nia agradese mós ba estudante husi sentru formasaun Don Bosco tanba ho kapasidade, badaen no esperénsia neebé sira iha, bele halo buat di'ak.

Nia mós husu ba SEFOPE atu fó nafatin formasaun ba joven sira hodi kontinua hola parte no sai na'in ba prosesu no progresu dezenvolvimentu nasaun nian.

Sekretáriu Estadu Alarico do Rosário mós husu ba entidade hotu atu haree no utiliza produtu sira ne'ebé SEFOPE produz.

"Ba entidade hotu-hotu atu haree ba ita-nia joven sira-nia produtu ne'ebé iha, liu-liu abilidade no skill, par bele uza sira, tanba sira mak nu'udar produtu lokál ne'ebé SEFOPE produz ona," nia dehan.

Iha fatin hanesan Komisariu Faustino agradese ba SEFOPE tanba bele konstrui ona postu ne'e ho di'ak.

"Agradese ba SEFOPE nomós ba ekipa hotu husi sentru formasaun Dom Bosco ne'ebé halo kontrusaun ho di'ak tebes ba postu ne'e," nia dehan.

Komisáriu mós husu ba membru sira ne'ebé sei uza fatin ne'e atu uza ho kuidadu, atu nune'e bele halo atendimentu neebé diak ba sidadaun sira ne'ebé mai hato'o sira-nia problema.(*)