Tempotimor (Díli)- Orsamentu Jerál Estadu (OJE) ne'ebé Ministériu Finansas atribui tetu fiskál ba tinan 2021 nian ba iha Ministériu Negósiu Estranjeiru no Kooperasaun (MNEK) ho montante tokon US$ 22.
Maibé, tanba montante OJE ne'ebé tetu ba MNEK la sufisiente, nunee sira halo tan pedidu adisionál ho montante tokon US$ 28 to'o US$ 30 hodi foka ba iha área multilaterál ninian.
Ministra Negósiu Estranjeiru no Kooperasaun (MNEK), Adlazija Magno hatete, tanba TL enfrenta situasaun post Covid-19, MNEK nia prioridade maka tenke aserta tan servisu iha multilaterál, tenke servisu hamutuk tan ho organizasaun internasionál barak, depois tenke servisu hamutuk ho país sira seluk para hodi kombate hamutuk Covid-19.
Tuir nia, durante situasaun pandémia Covid19, rezultadu mudansa barak mak akontese.
"Ita tenke solidariedade entre país ne'e tenke maka'as liu tan. Purtantu, prioridade MNEK nian iha 2021 mak iha área multilateral", hatete Adalzija, iha Ministériu Finansas Ai-tarak Laran, Segunda (28/9).
Nia informa, tetu fiskál OJE 2021 nian ba MNEK ho montante tokon US$ 22, maibé ne'e la to'o, sira husu tan adisional tokon US$ 28 to'o 30 hodi fó prioridade ba multilaterál nian, tanba post Covid-19.
"Ida ne'e sei bele asegura para 2021 ami bele hala'o atividade", dehan nia. (*)