Tuir nia, divida ne'ebé Timor Gap iha hamutuk tokon US$ 4 presiza klarifika, tanba ne'e presiza identifika montante dívida ne'ebé Timor Gap iha.
"Hau hanoin tokon US$ 4 ne'e impossível, tenke cek didi'ak lai," dehan Abel ba www.tempotimor.com, iha PN, Segunda (28/9).
Deputadu ne'e salienta, divida iha ne'e normal tanba Estadu ka kompaña sempre iha dívida, maibé relasiona ho montante divida Timor Gap nia ne'e boot demais, nune'e presiza klarifika.
"Hau cek took lai, maibe hau la yakin (fiar) divida too tokon US$ 4," dehan Abel.
Antes ne'e, Prezidente Timor Gap, António José Loiola hateten, estrutura anteriór hatudu jestaun la di'ak, hodi rai hela lembransa ida ba kompañia Estatál Timor Gap.
António ne’ebe antes ne’e kaer pasta hanesan Vise-Prezidente Timor Gap dehan, sira deskobre dívida bo’ot atu selu.
“Momentu ha'u fiar husi governu ba lidera Timor Gap ami tama ba dívida ne’ebé boot la halimar tokon US$ 4, osan ne’ebé iha kaixa rihun US$ 250. Ida hatudu katak inkapasidade jestaun sira iha anteriór, katak durante ne’e osan ne’ebé ita selu konsultan barak liu fali duke despeza ba kompañia rasik,” dehan nia. (*)