Diretora PNDS, Claudina Sores Pinto hateten, orsamentu adisional ne'e atu halo konstrusaun uma ba kbit laek hamutuk 2.544 no kada suku ho uma 6.
"Ohin ita hetan pedidu husi Primeiru Ministru atu mai halo aprezentasaun relasiona ho uma kbiit laek, ne'ebé hanoin atu implementa iha purvolta 424 suku ho orsamentu ne'ebé propoin iha ne'eba purvolta tokon US$50 atu bele kostrui uma kbit laek purvolta 2.544", dehan nia, ha Ministériu Finansas Aitarak-Laran, Segunda (28/09).
Nia dehan, orsamentu atu halo konstrusaun uma ba kbiit laek ne'e husu adisional ba Orsamentu Jerál Estadu 2021 nian.
OJE ba tinan 2021 tama iha pakote ne'ebé Ministériu Finansas fo ba PNDS purvolta tokon US$11.82, nune'e orsamentu tokon US$ 50 ne'ebé atu halo implementasaun ba uma kbit laek ne'e husi adisional.
Alende ne'e, orsamentu tokon US$ 50 adisional mós atu halo reabilisaun ba sede suku sira no implementasaun ba konstrusaun ne'e ba munisípiu 12 inklui RAEOA.
"Proposta adisional ne'ebé ohin aprezenta ba munisípiu hotu-hotu, Dili iha postu rua de'it mak ita propoin Metinaru ho Atauro", nia subliña.
Orsamentu adisional ba programa konstrusaun ba uma kbit laek tokon US$ 50 no reahabilitasaun sede suku tokon US$ 1.3, nune'e total adisional PNDS nian hamutuk $51.3 milloes.(*)