Ba polítika ne'e, Ministru Admimistrasaun Estatál (MAE), Miguel Pereira de Carvalho informa, Segunda (28/9), ekipa sira hahú hala'o ona teste dahuluk ba kandidatu administradór husi munisípiu tolu hanesan Baukau, Vikeke no Lautém.

"Teste hahú ona ohin. Ohin husi munisípiu Vikeke, Baukau, Lautém, ezame hahú ona ohin dadeersan tuku 09:00, no depois ekipa juri sira sei halo selesaun ba materia ezame sira ita bele hatene ona", dehan nia, iha Ministériu Finansas (MF) iha Ai-tarak Laran, Segunda (28/09).

Nia hatete, daudaun ne’e MAE inisia hela prosesu rekrutamentu tuir méritu ba munisípiu 6 hanesan Vikeke, Baukau, Lautém, Ainaro, Aileu ho Kovalima.

Maibé, munisípiu tolu mak hala'o uluk ona teste ba loron ohin nian, no munisípiu sira seluk sei ezame iha tempu tuir mai.

Miguel dehan, depois ezame, tuir dekretu lei, ministériu sei lori ba diskute iha grupu traballu tékniku interministeriál iha desentralizasaun administrativa nian, sei lori mós ba iha konsellu konsultivu munisipál para atu pronúnsia.

"Depois mak ha'u sei lori kandidatu ne'ebé mellor klasilifikadu hodi ba iha konsellu ministru para atu bele halo despaixu ida, halo rezolusaun governu ida para deside sé mak sai hanesan administradór ba munisípiu sira ne'e", esplika nia.

Bainhira husu kona-ba orsamentu ne'ebé uza hodi hala'o teste rekrutamentu ba kandidatu administradór munisípiu sira, nia dehan, orsamentu laiha, purke osan ne'e uza husi munisípiu sira nia orsamentu.

"Purtantu, atu halo susbstituisaun ne'e, sira ba para atu manan fali saláriu sira ne'ebé atu sai ne'e nian", dehan nia.

Entretantu, teste ne'e rasik MAE hala'o durante loron ida de'it, ho totál kandidatu administradór husi munisípiu tolu Vikeke, Baukau no Lautém, hamutuk ema na'in 24 mak kompete iha vaga ne’e. (*)