"Ohin iha enkontru ida ne'e ami halo koordenasaun de traballu iha SEKoop nia laran rasik, ho ajenda planu ba implementasaun rekuperasaun ekonómika nian", hatete Sekretáriu Estadu Kooperativas (SEKoop), hafoin halo abertura ba enkontru alargada ho nia funsionáriu sira iha eis Helly Port Lanud, Bairo Pité, sexta (25/09).

Elizário hatutan, liuhosi reuniaun ne'ebé sira hala'o ohin, atu define mós kona-ba tarefa de traballu entre nível nasionál no sentrál, saida mak atu halo iha nivel nasionál no munisipál atu bele fó implementasaun di'ak ba programa rekuperasaun ekonómiku.

Nia hatete, sira sei trasa hanoin atu bele asegura programa rekuperasaun ekonómiku, atu iha nafatin iha sustentabilidade hodi bele asegura bem-estár família no sosiedade nian hodi kontribui ba dezenvolvimentu ekonómia nasaun nian.

Nia dehan, planu asaun ne'ebé sei halo mak, iha nível nasionál sei koordena oinsá mak asegura relasaun sira institusional nian iha nível nasionál,  iha nível munisípiu oinsá mak atu organiza no mobiliza fatin ho di'ak oinsá mak implementa planu rekuperasaun ekonómika sira ne'e.

"Iha planu tekuperasaun ekonómika ne'e, kuaze 40% husi orsamentu alokadu iha SEKoop, tanba ida ne'e ami halo esforsu atu fó implementasaun ba orsamentu ne'e hodi fó benefísiu direta ba povu iha nível lokál", nia hakotu.