Tuir dokumentu ne’ebe tempotimor.com asesu hatudu lei organika Ministeiru Justisa ninia aprovadu ona iha KM iha loron 7 Novembru 2018, maibe sei pendente hela iha MRLAP. Nune’e obriga Ministeiru Justisa lao ho Lei Organika VI Governu nian.

Tuir informasaun, Lei Organika Ministériu Justisa ne'ebe aprova ona iha KM bainhira baixa MRLAP artigu balun ke aprovadu ona lakon fali.

Agora daudaun, Ministeiru Justisa (MJ) iha VIII Governo Konstitusional sei halerik buka dalan hodi hakotu impasse budu Lei Organika iha MRLAP.

“Tuir loloos orgánika VI Governu ne’e mós labele implementa tanba orgánika VIII Governu nian iha tiha ona dekretu lei nú.14/2018 fulan agostu nian," dehan Ministru Justisa, Manuel Carceres, iha servisu fatin, Tersa (9/4).

Lei Orgánika VIII Governu ne’e hanesan instrumentu legal ida atu orienta servisu ministerial nian.

“Ha’u labele book-an, labele implementa tanba ha’u tenke ser hein lei orgánika ida foun. Kuandu promulga tiha mak ha’u bele nomeia diretór foun sira ne’e,” dehan Ministru.

Nia hatutan, agora daudaun labele implementa politika Governu AMP nian tanba sei lao ho Lei Organika anterior nian.

"Ha’u labele implementa polítika AMP nian ne’e tuir pensamentu AMP nian, ida ne’e mak difikuldade boot ida ba ami," tenik nia.

Problema seluk ne'ebé Ministru Justisa enfrenta maka difisil atu ezekuta Orsamentu Jerál Estadu (OJE) tanba laiha lei organika.

“Orsamentu ba iha ami-nia orgánika foun ne’e labele inplementa, ne’e nia konsekuensia iha dia 31 Dezembru ne’e ha’u tenke fó fila fali ba Estadu", hateten Manuel.

Nia hatutan, orsamentu ba diresaun foun sira labele gasta husi Janeiru too Abril, maibe kuandu bele apeezenta ba Prezidente Repúblika hodi promulga maka bele lao ona iha Abril nia-laran. Nune'e, ba fulan hirak liu ba nian tenke hatama fali kofre Estadu.

Antes ne'e, MRLAP hasoru malu ho ministru ho vise-ministru sira hodi buka solusaun ba problema Lei Organika ne'ebé 'butuk hamutuk' hela.

Ministru Reforma Lejizlativa Asuntu Parlamentár, Fidelis Magalhães hateten, duvida ho kualidade Lei Organika Ministerial sira ne'ebé aprova ona iha Konsellu Ministru, tanba ne'e presiza hadia fali lei sira ne'e.

Tuir nia, Governu tenke halo ho lei orgánika kualidade atu labele hamonu Primeiru Ministru, Taur Matan Ruak nia-oin.