Tempotimor (Dili)-Maske informasaun espekula ona iha média sosiál facebook, katak tempu besik Primeiru Ministru (PM) Taur Matan Ruak sei rejigna-aan, maibé bazeia ba informasaun ne'e PM Taur katak, la mehi atu rejigna-aan.
PM Taur Matan Ruak informa lia hirak ne'e iha Palásiu Prezidensiál bairru-pite, Dili, hafoin enkontru semanál ho Prezidente Repúblika (PR) Francisco Guterres Lú-Olo.
"Ha'u hanoin sira mehi karik, uluk nusa la rejigna-aan, agora ne'e tempu rejigna-aan laiha tiha ona," dehan PM Taur, Kinta (24/9).
Nia husu ba públiku lalika fiar, tanba PM la mehi ba rejignasaun.
"Agora ha'u servisu maka'as lori Orsamentu Jerál Estadu (OJE) ba Parlamentu Nasionál (PN), agora rejigna-aan ba saida nian, ne'e laiha ida, lalika fiar ida ne'e. Ha'u hanoin sira hamlaha oituan karik," nia tenik.
Entretantu, observasaun www.tempotimor.com nota katak, bainhira PM Taur hatán ba públiku kona-ba informasaun rejignasaun nian, xefe governu ne'e hatán ho hamnasa de'it.(*)