Tempotimor (Dili) - Ministériu Asuntu Parlamentár no Komunikasaun Sosiál (MAPKOMS) ho Komisaun A Parlamentu Nasionál, realiza audiénsia publika hodi debate proposta Orsamentu Jerál Estadu (OJE) 2020.

Ministru Francisco Jerónimo afirma, alokasaun OJE ba Ministériu Asuntu Parlamentár no Komunikasaun Sosiál iha tinan 2020 hamutuk tokon US$ 4.

Liga ba orsamentu ne'ebé iha, sei aloka de’it ba transferénsia publika, bens de servisu, ho saláriu de’it, maibé kona-ba alokasun orsamentu kapitál dezenvolvimentu, kapitál menór, fundu infraestrutura sei laiha tanba haree ba tempu la permite ona atu ezekuta.

Tuir nia, husi montante tokon US$ 4 ne'e soma hamutuk ho Dotasun Orsamentál Temporaria (DOT) ne'ebé durante ne'e MAPKOMS ezekuta atinji %72, restu husi  %28 ida ne'e sei kobre ba fulan-Outubru, Novembru, Dezembru.

"Ami-nia proposta tetu orsamentu ne'ebé mai husi governu ami aprezenta, responsabiliza saida mak ami halo no saida mak seidauk, sira konkorda ho buat ne'ebé iha," dehan MAPKOMS, Francisco Jerónimo, iha PN, Kuarta (23/9)

Kona-ba prosesu audiénsia ho MAPKOMS ne'e, nia dehan, deputadu sira ladún foti kestaun barak ba valór orsamentu maibé sira ko’alia liu kona-ba MAPKOMS nia funsionáriu sira.

Nia hatete, MAPKOMS to'o agora seidauk simu funsionáriu foun, maibé funsionáriu sira uluk mak nafatin to'o agora seidauk halo mudansa ruma. (*)