Tempotimor (Dili)- Eis-Prezidente Republika periodu (2002-2007) José Ramos Horta hateten, ema balun hasai deklarasaun iha media sosial kompara ki'ak entre nasaun Timor-leste (TL) ho nasaun boot sira ne'e, la hatudu kapasidade intelktual ho seriedade.

Tuir Laureadu Novel da Paz José Ramos Horta katak, iha nivel ki'ak mak kompara fali Timor-leste ho nasaun boot sira, ne'e la iha logika, tanba nasaun boot ukun an uluk no Timor-leste ukun an ikus.

"Hau haree iha Facebook halo tan komparasaun ida Timor ki'ak liu rai sira hanesan Mianmar, Cambodia, Indonesia i rai lubuk ida katak, Timor ki'ak liu, ne'e la hatudu ka la iha seriadade intelktual", dehan Horta iha ninia diskursu hafoin vizita ba Suku Grotu, Postu Same Vila, Munisípiu Manufahi, tersa (22/09).

Tuir Horta, se kompara Timor-leste ho nasaun boot sira, ne'e hanesan kompara labarik ki'ik ho ema ne'ebé idade ona.

"Se o kompara fali Timor ho Mianmar, Indonesia, entaun hanesan kompara fali labarik oan tinan 7 ou 8 ho ema klosan boot ida tinan 20 resin ona, agora ida foin tinan 7 ne'e nia halo saida ona no ida tinan 20 ne'e halo ona saida iha nia Vida", tenik Ramos Horta

"Maibé haree iha dadus estatistika komparativu hau hakfodak, iha tempu portugues Timor oan ida ita bolu ho lian portugues esperansa de vida, signifika se ema timor ida, moris to'o tinan hira, klaru balun liu tan, mais barak liu menus liu tan, entaun halo iha klaran, tempu portugues 40 anus o bele esperansa de vida, pois tama tempu okupasaun la konta ho sira ne'ebé mate, tanba violensia la konta, tanba la'os mate tanba idade, maibé mate tanba violensia", esplika Horta

Maske nune'e, maibé tuir dadus statistika iha parte populasaun asesu eletrisidade Timor-leste diak liu, kompara ho nasaun Mianmar.

"Tanba hau rasik hakfodak haree didiak númeru sira ne'e hotu, tanba hau lee hau ba halo investigasaun asesu ba eletrisidade iha Timor barak liu duke Mianmar, 80 pursentu populasaun Timor asesu ba elitrisidade", tenik Horta