Nia dehan, lider arte-marsiál PSHT presiza fó atensaun ka hapara membru sira ne'ebé ba sa'e sabuk, nune'e bele fó tempu ba governu atu prepara kondisaun ba reativa arte-marsiál.

Nune'e, Sekretáriu Estadu Juventude no Desportu (SEJD) bolu ona lider arte-marsiál PSHT atu fó atensaun ba membru sira.

"Ami bolu ona lider arte-marsiál ne'ebé nia membru kruza fronteira ilegál liuliu PSHT, informa ona ba sira no iha dadus investigasaun ne'ebé Polísia Nasionál Timor-leste (PNTL) halo fahe ona ba sira para bolu atensaun ba sira-nia membru", dehan Abrão, iha edifísiu Ministériu Finansas, Aitarak-Laran, horisehik.

Nia hatutan, bolu lider arte-marsiál PSHT atu hapara membru sira ba sa'e sabuk iha Atambua, nune'e labele prejudika ba prosesu rejistrasaun arte-marsiál sira nian.

"Nune'e sira hakmatek para fó tempu ba governu atu prepara di'ak liután kondisaun atu entrega arte-marsiál ba komunidade no sosiedade nia-laran", nia hakotu. (*)