Vise-Ministru Interiór (MI), António Armindo hatete, presiza duni husu adisionál tanba pakote tetu Orsamentu Jerál Estadu (OJE) tinan 2021 ne'ebé prepara husi Ministériu Finansas fó ba Ministériu Interior ne'e servisu importante balun la inkui.
"Ohin iha proposta ne'e, ita propoin atu aumenta osan adisionál ne'ebé hanoin importante atu implementa iha 2021, maibé la konsege prienxe iha pakote ne'ebé Ministériu Finansas fó, entaun ita mai ho alternativu para hato'o proposta adisionál atu tau ba iha 2021", dehan Vise-Ministru, iha edifísiu Ministériu Finansas, Aitarak-Laran, Segunda (21/09).
Nia afirma, importante ne'ebé husu adisionál ne'e liga liu ba servisu PNTL nian hanesan konstrusaun postu Unidade Patrollamentu Fronteira (UPF) no viatura ne'ebé sira presiza tenke iha atu koloka ba postu eskuadra no komandu munisípiu sira atu hala'o servisu ho di'ak.
"Depois ita propoin para hola komputadór ho printer sira, nune'e distribui ba iha munisípiu, tanba tuir informasaun ne'ebé públiku hotu hatene katak, ita-nia membru PNTL iha munisípiu dezarraska tebes, dalaruma hakerek relatóriu mos ho liman de'it", nia dehan.
Tanba ne'e, Timor-Leste hanesan nasaun tenke haree kestaun ne'e, nune'e ajuda PNTL sira hala'o servisu ho diak. Alende ne'e, iha Servisu Migrasaun ne'ebé importante tebes atu kontrola ema tama no sai iha Timor-Leste.
"Ita propoin atu estabelese Border Management Information System (BMIS), tanba BIMS importante tebes atu hala'o servisu sira ne'ebé ligasaun ho migrasaun tenke online de'it. Tanba ne'e, agora dadaun instalasaun besik hotu ona, maibé ita kontinua tau osan atu instala mós iha embaixada no konsuladu sira iha rai-li'ur, nune'e aban-bainrua ita la uza manuál ona, buat hotu online de'it", tenik Armindo.
Nia mós dehan, adisionál ba Sekretariu Estadu Protesaun Sivíl (SEPS) liuliu iha bombeirus no dezastre naturais.
"Tanba ita hotu hatene dezastre naturais sempre akontese, sa tan agora besik udan ona, entaun tenke prepara para tinan oin buat ruma akontese ita bele responde", tenik nia.
Entertantu, proposta adisional husi Ministériu Interiór nian ne'ebé kompostu husi protesaun sivíl, Servisu Migrasaun adisionál rihun US$ 14 no ba Polísia Nasionál Timor-leste (PNTL) rihunUS$ 11 ho totál rihun US$ 17.(*)