Aniceto Fó Prazu Oras 24 Debate OJE 2020 iha Komisaun

Prezidente Parlamentu Nasionál (PPN) Aniceto Longuinhos Guterres Lopes Prezidente Parlamentu Nasionál (PPN) Aniceto Longuinhos Guterres Lopes Foto Supply

Tempotimor (Dili)-Prezidente Parlamentu Nasionál Aniceto Guterres deside hodi fó prazu oras 24 ba Komisaun C trata asuntu Finansas atu debate proposta Orsamentu Jeral Estadu (OJE) 2020.

Aleinde proposta OJE 2020, meza PN mós deside hodi entrega proposta lei númeru 4/V (2a) kona-ba aprovasaun akordu servisu aero entre Timor-Leste ho Australia ba komisaun B trata asauntu Defeza, Seguransa no Negosiu Estranjeiru.

Hafoin entrega proposta refere ba kada komisaun, Prezidente PN deside tempu atu finaliza debate iha komisaun.

Ba Komisaun C neebé debate proposta OJE 2020, Prezidente PN fó prazu oras 24 nia laran, no ba komisaun B ho prazu loron 90. Relasiona ho proposta 2 nee, Deputada Bankada CNRT Maria Fernanda Lay hahú duvida tanba nia parte la garante katak PN bele iha kapasidade atu atende hotu proposta rua refere.

Fernanda dehan, nia la hatene PN atu hahú deskuti uluk proposta ida ne'ebé, tanba prosposta rua ne'e meza deside fó dala ida deit.

Tan nee, nia husu ba meza PN atu haree kestaun nee tanba agora iha epoka debate OJE 2020 nian, nunee labele insere tan serbisu seluk.

"Ita tama ona iha epoka do orsamento geral do estado 2020, ita labele ba insere atividade seluk, agora atividade de urgensia, hau la kompriende ida ne'ebé mak uluk, orsamentu mak uluk ka lei mak uluk ka ida ne'ebe mak uluk," dehan Fernanda iha plenaria estra-ordinaria iha PN, Kuarta (16/09).

Ba kestaun nee, Prezidente PN dehan, meza propoin ba komisaun atu finaliza relatoriu pareser ba proposta lei rua nee tanba lei rua ne'e importante hotu.

"Husi proposta rua ne'e ita labele adia tanba iha asuntu balun ke urjente," katak nia.(*)

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.