Planu Reabilita Aeroportu Baukau, DIGCOV Husu Governu Haree Realidade

Portavoz DIGOV Gil Ferdes da Costa hamutuk ho kometiva iha hela sede CPD-RDTL nian iha Manleuana hodi hala'o Konferénsia Imprensa kona-ba Reabilitasaun Aeroportu Baucau. Tersa (15/9). Portavoz DIGOV Gil Ferdes da Costa hamutuk ho kometiva iha hela sede CPD-RDTL nian iha Manleuana hodi hala'o Konferénsia Imprensa kona-ba Reabilitasaun Aeroportu Baucau. Tersa (15/9). Foto Tempo Timor

Tempotimor (Díli)-Governu liuhusi Ministériu Defeza anúnsia ona kona-ba akordu poténsia estranjeiru balu atu halo reabilitasaun ba aeroportu Baukau ne'ebé durante ne'e kondisaun aat no abandona.

Bazeia ba planu ne'e, Diresaun Gerál dos Assunto Combatentes e Veteranus (DIGOV) FRETILIN ka FRETILIN AMPLA hatoo sira-nia pozisaun ba governu atu halo reabilitasaun tenke haree uluk ba realidade ne'ebé ohin TL enfrenta.

Portavós DIGOV, Gil Ferdes da Costa hatete, bainhira governu atu halo akordu ruma ho potensia estranjeira sira kona-ba atu hadi'a aeroportu Baukau, tenke haree didi'ak uluk lai realidade ne'ebé mosu, tanba to'o oras ne'e TL seidauk iha nia aviaun rasik atu bele garante navegasaun áerea.

“Ita seidauk iha kapasidade militár natoon, hodi segura RDTL nia soberania tomak husi lalehan, tasi no rai”, dehan nia, iha Manleuana, Tersa (15/09).

Nia hatete, Estadu tenke haree didi'ak atu bele hola desizaun hasoru ita-nia realidade rasik, tanba ida ne'e buat ne'ebé fó perigu tebes ba povu no nasaun.

Tuir nia, poténsia estranjeira sira balu bele aproveita fali situasaun difísil ruma iha nasionál no internasionál iha futuru, hodi apodera no instala nia baze militár iha pontu estratéjiku ne'ebé eziste iha TL.

“Ukun nain sira tenke hola desizaun ho balansu no labele sadere ba poténsia estranjeiru balu, enkuantu poténsia sira seluk mós nia ema bele mate iha fatin, tanba iha tinan 2003 prova hatudu ona katak bainhira sira lori ajudu umanitáriu mai timor, sira balu mós mate iha ne'ebá”, dehan nia.

Nia husu, ba governu tenke hola atensaun másimu, tanba RDTL hamriik nu'udár país naun-aliñadu, hadomi pás, la halo parte iha kualkér bloku militár iha mundu no seidauk rekuza poténsia estranjeiru sira-nian iha solo-Sagrado-Pátrio.

Gil prefere ba governu atu tau atensaun ba uluk Fragata no Elikópteru ne'ebé sai hanesan komandu ba Frente nian hodi bele asegura netik RDTL nia tasi, lalehan, rai no inklui rikusoin sira ne'ebé TL eziste.

Nia dehan, tuir loloos governu bele sosa ona Elikópteru sira ne'e, tanba kada tinan TL nia kapasidade finanseira boot iha fundu mina-rai, maibé to'o ohin loron sasán hirak ne'e seidauk bele sosa, tanba ukun nain sira fakar liu osan ba saláriu no vensimentu ne'ebé boot no aas de'it.

“Fakar ba pensaun vitalísia, sosa kareta luxu no seluk tan hodi halo ema sai riku no moris haksolok iha povu Maubere nia terus leten, duké atensaun ba seguransa RDTL nia tasi no lalehan ne'ebé sei mamuk hela”, dehan nia.(*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.