Empase polítika ne'ebé la'o iha Timor-Leste durante tinan tolu nia laran ona, tanba ne'e presiza orsamentu hodi finansia no responde ba nesesidade povu nian.

"Ha'u iha espetativa katak orsamentu ne'e sei bele liu. Entaun ha'u fiar katak deputadu sira ne'ebé ohin hala'o fali ona sira-nia knaar, sira iha konxiénsia katak povu ne'e presiza osan," dehan PR Lú-Olo hafoin halo abertura ba sesaun lejilativa datoluk PN nian, Tersa (15/9).

Xefe estadu ne'e mós afirma, presiza osan para implementa programa sira ne'ebé iha par hadi'a povu nia moris.

"Presiza osan para selu ba empreza sira ne'ebé ba kotuk la selu to'o agora, presiza osan para iha kapitál oituan hodi hala'o roda ekonomia ne'e la'o nafatin, ne'ebé ha'u fiar katak orsamentu sei liu," katak PR.

Entretantu Orsamentu Jerál Estadu (OJE) tinan fiskál 2020 nian governu tetu hamutuk billiaun $1.497.1 no 2021 nian hamutuk billiaun $1.6 ne'ebé sei finansia ba seitór krusiál lima.

"Prioridade sira ne'ebé sei konsentra iha 2021 nian ne'e mak, seitór kapitál sosiál, seitór dezenvolvimentu ekonómika ne'ebé inkaixa mós ho médida rekoperasaun ekonomia nian, infraestrutura bázika no konetividade, dezenvolvimentu ambientál no seitór instituisionál," Januário esplika iha (4/9).

Nune'e Orsamentu Jerál Estadu (OJE) ba tinan 2021 nian, barak liu sei prevé ba transferénsia públika.

"Kategória saláriu no vensimentu iha tokon $216.2, Bens no servisu iha tokon $451.1, Transferénsia públika iha tokon $480.7, kapitál dezenvolvimentu iha tokon $235.8, enkuantu iha kapitál menór iha tokon $6, maibé halo de'it akizasaun ba ekipamentu sira ne'ebé ita prozeta katak iha tinan nia rohan mak la konse,"Nia sublina.(*)