Iha sesaun ne'e, xefe bankada KHUNTO, deputada Olinda Guterres hatete, sorte boot, tanba PR Lú-Olo bele mai PN, tanba atu hasoru PR dala-ruma telefone no reza Ave Maria dala tolu mak foin hasoru.

"Momentu meza PN rahun, ha'u mós rahun hotu, ema mai hurlele ha'u iha ha'u-nia fatin, mezmu kee ha'u tuur iha ha'u-nia fatin.

Nia dehan, uluk sei iha AMP hamutuk ho CNRT buat hotu la'o di'ak, maibé mosu koligasaun foun ema dehan PN ilegál hahoris governu de-faktu. Tanba ne'e husu ba ita-boot bele esplika uitoan ba ami para bele hatene, tanba ha'u mós deputada foin ladun komprende," dehan Olinda.

Iha fatin hanesan, bankada CNRT mós hamosu krítika no fó sala ba PR Lú Olo, tanba CNRT konsidera impase polítika nia hun maka Xefe Estadu.

"Polítika iha ita-nia rai momentu ne'ebé doutór Lú Olo kaer ulun nu'udar Prezidente Repúblika (PR) maka rezulta ona impase polítika, hodi satan prosesu tomak konstrusaun estadu nian hahú husi 2018 to'o 2020," dehan deputadu Patrocino dos Reis Fernandes, iha plenária PN, Segunda (15/9).

CNRT mós atira ba PR Lú-Olo katak, Marí Alkatiri mak volante hela Prezidente Repúblika, Francisco Guterres Lú Olo no Primeiri Ministru, Taur Matan Ruak.

"Empase sira la'o ona, maibé mosu ema estratéjiku beik-matenek ida ne'ebé formadu iha direitu husi rai Áfrika fó orientasaun para FRETILIN sai ai-tonka ba governu daualu to'o 2023. Tanba ne'e, Xefe Estadu la aprova pedidu demisaun PM Taur nian no dada fila tanba sei hetan hela ai-tonka husi FRETILIN," nia dehan. (*)