Portavós VIII Governu Konstituisionál, Merício Juvenal dos Reis Akara hateten, Xefe Governu mak iha iniciativa hodi bolu hamutuk membru Governu sira, inklui membru governu indijitadu hodi troka ideia kona-ba servisu hodi lori susesu ba governasaun ne'e.

“Troka ideia atu atualiza informasaun ba malu ne’ebé ho karater informal”, tenik nia, iha Palásiu Governu, Sesta (5/4).

Iha enkontru ne’e fó liberdade ba membru governu sira atu aprezenta dezafiu no servisu ne’ebé kada membru goversu sira halo ona, nune'e Xefe Governu mós husu ba membru Governu sira kona-ba servisu sira-nia iha kada ministériu.

“Dezafiu sira balun ne’ebé membru governu balun aprezenta mak lei orgánika ne’ebé seida’uk kompleta hodi difikulta serbisu ministerial nian, no balun kona-ba infraestrutura ne’ebé kestiona husi públiku”, tenik Akara.

Iha biban ne'e, Xefe Governu mós husu ba membru Governu sira atu labele rona boatu sira ne’ebé espekula iha públiku, rona mak Xefe Governu tanba governasaun ida iha komandu ida maka primeiru ministru.