Profisionál ne’ebé dezenvolve atividade jornalístika iha papél importante tebes, tanba responsabiliza ba preparasaun no diseminasaun informasaun hotu-hotu relasiona ho prevensaun no kontrolu surtu COVID-19 iha Timor-Leste.
"Profisionál ne’ebé dezenvolve atividade jornalístika iha Centro de Convenções de Díli, no iha lokál ne’ebé dezenvolve asaun prevensaun no kontrolu, nomeadamente iha sentru izolamentu, postu sira iha fronteira no estabelesimentu saúde, ho kondisaun espozisaun direta ba virus SAR-Cov-2 no risku ba dezenvolvimentu moras COVID-19", dehan komunikadu ne'ebé www.tempotimor.com asesu iha, Segunda (14/09).
Tuir komunikadu ne'e, Dekretu-Lei ne’e kria subsídiu ba profisionál sira ne’ebé dezenvolve atividade jornalístika, tuir Lei númeru 5/2014, 19 Novembru, Lei Komunikasaun Sosiál, hamutuk ho Sala Situasaun Sentru Integradu Jestaun Krize durante implementasaun estadu emerjénsia deklaradu no renovadu husi Dekretu Prezidente Repúblika númeru 29/2020, 27 marsu, 32/2020, 27 Abríl no 35/2020, 27 Maiu, ho kondisaun espozisaun direta ho virus.
Kondisaun sira ba atribuisaun subsídiu, tuir Dekretu-Lei, mak profisionál sira ne’ebé dezenvolve atividade jornalistika hamutuk iha Sala Situasaun Sentru Integradu Jestaun Krize ka tanba Governu husu atu halo produsaun notísia durante implementasaun estadu emerjénsia sei hetan subsídiu finanseiru ba kada loron efetivu serbisu ninian tuir kondisaun sira ne’ebé temi iha Dekretu-Lei ne’e.
Argumenta iha komunikadu ne'e katak, profisionál ne’ebé sei hetan subsídiu ne’e mak sira ne’ebé integra iha Sentru Média Covid-19 husi Unidade Informasaun Públika no profisionál ne’ebé la integra iha Sentru Média Covid-19.