Tera Bulak 'sadik' Prezidente Tribunál Rekursu, tanba la autoriza fatin Kaikoli atu harii edifísiu CCLN no uza fali fatin ne'e hodi hari edifísiu Tribunál Distritál Dili.
"Deolindo nu'udár ema moris koñese ami, tanba povu mak tau nia iha leten, maibé komu nia lori lei kontra ami, ami kontra nia de'it, seluk ami la kontra no ami nia ema intelektuál barak para debate ho nia", dehan nia, hafoin hasoru-malu ho Primeiru Ministru, Taur Matan Ruak, iha Palásiu Governu, Segunda (14/09).
Fatin ne'ebé daudaun Tribunál Rekursu deside ona atu harii edifísiu Tribunál Distrital Dili ne'e, Tera Bulak hakarak hari edifísiu CCLN nian.
"Fatin ne'ebá deside mate no raan fakar atu harii sede iha ne'eba, la'ós atu harii Deolindo ninia hakarak iha ne'ebá", dehan nia.
Maski nune'e, antes ne'e, Primeiru Ministru, Taur Matan Ruak, deside katak edifísiu CCLN nian sei harii iha Arte-Moris, Komoro. Nune'e daudaun Xefe Governu kaer nafatin desizaun ne'e.
Konstrusaun edifísiu Tribunál Distritál Dili (TDD) ne'e Prezidente Tribunál Rekursu rasik mak asina ona kontratu ho kompañia internasionál Economic Corporation Group Co.Ltd, iha loron 05 fulan-Dezembru 2019 ho orsamentu liu tokon 10. (*)
