Antes ne'e, Eis-Prezidente Autoridade Nasionál Petróleu no Minerais, Gualdinho do Carmo da Silva, liuhusi semináriu Partidu CNRT deklara, publikumente úniku governasaun CNRT maka bele hanoin atu dada kadoras mai Timor-Leste.
Nune'e, Prezidente Bankada FRETILIN, Francisco Miranda Branco hateten, kestaun kadoras hanesan asuntu nasionál no husu atu partidu polítika sira labele privatiza no personafika ema ida de'it mak bele.
"Ne'e kestaun nasaun, kestaun ida ke ita hotuhotu ninian, labele privatiza, personafika katak ema ida de'it mak bele," dehan nia, ba www.tempotimor.com, iha Parlamentu Nasionál, Segunda (14/9).
Branco salienta, luta rezisténsia Timor-Leste nian to'o ukun aan iha lider komandu luta barak mak bainhira mate seluk substitui hodi lidera rezisténsia luta to'o remata, hahú kedas husi Saudozu Nicolao Lobato to'o Konis Santana.
"Bainhira ita-nia eroi boot Prezidente Nicolau Lobato mate, Komandante Xanana Gusmão troka, bainhira Xanana Gusmão ema kaer Komandante Mauhuno, bainhira mai ema kaer Komandu-da-luta pasa ba Koni Santana, bainhira Koni Santana mate kontinua ba Komandante Taur Matan Ruak," dehan Branco.
Deputadu ne'e akresenta, partidu FRETILIN mós defende kadoras mai Timor-Leste, tanba konsidera hanesan asuntu nasionál, hahú kedas bainhira Eis-Xefi Negosiadór, Mari Alkatiri, iha tempu negosisaun kadoras Bayu Undan defende ona kadoras mai Timor-Leste.
"Desde uluk kedas, la'ós agora de'it," dehan Branco. Antes ne'e, atuál Prezidente CNRT, Xanana Gusmão rekoñese, kadoras Greater Sunrise nu'udar asuntu nasionál la'ós CNRT nian.(*)