Print this page

PR Lú Olo Husu Médiku Akompaña Veteranu Sira

By September 11, 2020 1360
PR Dr. Francisco Guterres Lu Olo presta Omenajen ba Saudozu Renan Selak (11/9) PR Dr. Francisco Guterres Lu Olo presta Omenajen ba Saudozu Renan Selak (11/9) Foto Tempo Timor

Tempotimor (Dili) - Haree ba kondisaun veteranu barak ne'ebé moras hela maka Prezidente Repúblika (PR), Francisco Guterres Lú Olo, husu ba médiku sira ne'ebé halo tratamentu ba veteranu sira atu identifika veteranu sira iha munisípiu no akompaña kada fulan.

"Sira ne'e iha ONGV ne'ebá importante mak médiku sira ne'ebé halo tratamentu ba veteranu sira mak iha programa para kada fulan sira ba veteranu sira ne'ebé iha munisípiu, hodi akompaña sira-nia saúde, para hatene to'o momentu ne'ebé sei di'ak no momentu ne'ebé sei grave, para ita antesipa kedas, maibé husi Ministériu Saúde (MS) mak hatene," dehan nia, hafoin presta omenajen ikus ba Saudozu Renan Selac, iha nia rezidénsia, Fomentu, Sesta (11/9).

Xefe Estadu mós afirma, la'ós ospitál mak la seguru, maibé haree mós ba kondisaun atuál, entaun la konsege evakua saudozu Renan Selac ba rai li'ur.

"Kona-ba ospitál ita-nia kondisaun mak hanesan ne'e, maibé la'ós katak la seguru, ha'u bele dehan katak ita iha kondisaun mínimu, maibé ho situasaun agora ho Corona virus aviaun mós la semo, entaun ita labele evakua sai ba li'ur hodi halo tratamentu ba saudozu Renan Selac," nia tenik.

Iha fatin hanesan, Sekretáriu Estadu Asuntu Kombatente Libertasaun Nasionál (SEAKLN), Gil da Costa "Oan Soru", rekoñese veteranu barak mak kondisaun moras.

"Entre sira ne'ebé sei moris ne'e ha'u bele dehan laiha ema ida maka 100% saudavel, tanba idade avansadu hotu ona, mas ida ne'e mak realidade, ne'ebé nu'udar umanu iha rai ida ne'e ita tenke simu," katak nia. (*) 

Rate this item
(0 votes)
Last modified on Friday, 11 September 2020 16:27
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com