Antes ne'e, Prezidente PSHT hato'o ba membru sira atu labele ba sa’e sintu, maibé la konsidera hodi kontinua la’o nafatin. Tanba ne’e, afirma fali ba membru sira sira atu koopera ho parte seguransa.

"Ha'u husu ba alin sira ne'ebé foin lalais polisia kaptura, ita bazeia ba lei. Tanba tempu pasadu liu ba fó sai ona katak labele ba sorin ne'ebá (Atambua-Indonézia). Ha'u fó sai karta interna no esterna nian, alin sira ladún kumpre. Ne'e duni, agora daudaun polisia kaptura sira-nia direitu atu ita-boot sira prienxe tuir lei ne'ebé iha Timor-Leste," dehan Baltazár, iha SEJD, Lesidere, Sesta (11/9).

Nia mós apela ba membru sira ne'ebé sa'e sintu iha diáspora atu koopera ho Governu liuliu Ministériu Saúde ho seguransa hodi submete ba kuarentena hodi prevene surtu Covid-19.

"Imi atu mai karik ha'u husu ba ita-boot sira-nia konxiénsia umanu tenke koopera ho saúde, seguransa ho governu. Ba sira ne'ebé mai ilegál tenke ba iha kuarentena, ne'e para ita haree moras Covid-19 ne'e kona karik prevene kedas, se lae moras ne'e kona da'et mai moras, ita Timor ne'e uitoan de'it ita mate hotu kedas," dehan Baltazár.

Antes ne'e, Polisia Nasionál Timor-Leste hamutuk ho FALINTIL-FDTL konsege kaptura membru PSHT hamutuk 37 iha fronteira inklui 14 iha Kolmera, ne'ebé ultrapasa ilegalmente mai Timor-Leste hafoin remata sa’e sintu iha Atambua, Indonézia. (*)