Nune'e, Fundasaun Mahein husu atu Parlamentu Nasionál sira atu atualiza fali lei droga ne'ebé antes ne'e produs ona iha tinan 2017, tanba Lei Droga 2017 la tuir situasaun atuál, nune'e fó oportunidade ba suspeitu sira atu livre husi akuzasaun.
"Lei ne'ebé ita produs iha 2017 tenke atualiza mós ho situasaun atuál, tanba iha lei ne'e rasik la hatuur matéria rekursu (prima) sira hodi regula espesifikamente," dehan Diretór Fundasaun Mahein, João Almeida, ba www.tempotimor.com, iha knaar fatin, Fomentu, Kuarta (9/9).
Nia fó ezemplu, kazu kontentor ria ne'ebé hatama matéria prima droga nian hamutuk tonelada 160 ho tipu matéria produs droga PCC iha tinan 2018 ne'ebé suspeitu livre husi Tribunál tanba laiha lei espesífiku.
"Suspeitu livre, purke ita laiha lei espesífiku atu kondena hahalok hanesan ne'e," dehan João.
Nune'e, kazu ne’e sai referénsia ba Governu inklui Parlamentu Nasionál atu hamutuk haree hikas lei ne’e hodi atualiza tuir situasaun atuál.
"Husu Parlamentu Nasionál atu halo revizaun ou atualiza tuir situasaun sira ne'ebé akontese," dehan João.
Enkuantu, Lei Droga ne'ebé daudaun ne'e iha regula de’it droga ne'ebé hein uza hanesan ema lori, uza, fa'an no konsume.