"Ohin ko'alia ho Primeiru Ministru kona-bá projetu em curso no projetu foun sira ne'ebé atu halo iha tinan 2021 nian, tan ne'e mak ami aprezenta oitoan projetu la'o hela (em curso), saida mak atu halo no projetu sira foun liga ho kompeténsia área Obras Publikas nian", Dehan Ministru Obras Publikas (MOP), Salvador Pires, iha Palásiu Governu, kinta (10/09).

Governante ne'e esklarese, durante enkontru diskuti mos projetu ne'ebé la'o hela no projetu foun, hanesan infraestrutura bázika sira, hodi estabelese montante investimentu.

"Projetu hirak ne'e mak ohin diskuti hela, atu prepara oinsá halo selesaun ba projetu sira ne'e, atu diskuti iha Komisaun Revizaun Orsamentu Polítika tuir mai, ne'ebé sei halo iha semana ida ou rua nia laran, hodi estabelese montante investimentu orsamentu ba iha área infraestrutura", Tenik Nia

Alende ne'e, diskuti mos kona-bá orsamentu hodi finaliza projetu hirak ne'ebé la'o hela no kuantidade projetu sira.

"Projetu inkursu preve orsamentu hira atu bele finaliza? Ohin ko'alia oitoan kona-bá kuantidade projetu no haree estatutu progresu inkursu hela ne'e, no posibilidade investimentu", Salvador akresenta

Nia hatutan, Ohin seidauk fixa iha montante investimentu, tanba haree de'it posibilidade espasu fiskál, husi projetu ne'ebé Governu kompromete ona, iha kontratu ne'ebé la'o hela no posibilidade espasu fiskál, atu halo investimentu ba projetu hirak ne'ebé, VIII Governu hanoin atu halo.

"Ita boot sira haree, durante mandatu Oitavu Governu nian, iha problema barak hanesan impase polítiku, projetu sira tarjetu metas ne'ebé, oitavu Governu atu atinji, maibé seidauk bele komesa loloos, tanba ita-nia situasaun rasik la estável", Nia esplika

Nune'e tinan 2021 ne'e, oportunu tebes, atu hahú investimentu hodi bele atinji metas ka programa ne'ebé Primeiru Ministru aprezenta ba Parlamentu Nasionál, hanesan programa prinsipál ne'ebé VIII Governu Konstituisionál hakarak implementa durante mandatu.