Iha okaziaun ne'e, Lere Anan Timur husu Governu, atu tau mos atensaun ba saudozu nia família, liu-liu faluk ho oan kiak ne'ebé sei moris hela, iha tristeza nia laran, tanba sente lakon sira nia aman, husi sira nia leet.
“Mate ne'e hanesan úniku dalan ba ema hotu ne'ebé moris. Importante mak ita tenke fó onra hodi diginifika ba nia mate nomós ho nia moris, durante nia moris mai to'o hakotu nia iis”, dehan Majór Jenerál Lere Anan Timur, iha HNGV, Bidau, kinta (10/09).
Eis gerilleiru ne'e hatutan, saudozu hanesan vetaranu ida ne'ebé, luta durante tinan 24 nia laran, moris terus iha ai-laran, inklui nia família hotu ne'ebé terus mos ba rai no povu ida ne'e, hodi hetan ukun-rasik aan.
Lere Anan Timur akresenta, Governu tenke tau atensaun, hodi dignifika ka fó valór nafatin ba nia moris, liu-liu nia futuru ne'ebé husik hela ba nia oan sira.
“Entaun Governu tenke tau matan nia oan sira ne'e, tenke moris ho dignu, moris ho valór ne'ebé ke nia aman hanesan fundadór nasaun ne'e nian”. dehan Lere Anan Timur.
Majór LAT hatete, erói sira ne'ebé mak mate, sira mak Aswa'in iha rai ida ne'e, tanbá ne'e, ema hotu tenki banati tuir, hodi lori nasaun ne'e ba oin ho paz.
"Ba ita ne'ebé sei moris, ita deve hela sira, tanba sira mate ona, sira sai eroi no sira mak aswa'in ba iha rai ida ne'e, ita la'o tuir sira-nia ain fatin, lori ita nia nasaun ida ne'e ba oin, moris iha dame, hakmatek nia laran ba progresu dezenvolvimentu", hatete Lere.
Kona-bá luta iha ai-laran, Lere haktuir, saudozu “Renan-Selak” hanesan membru husi Rejiaun Ponta Leste nian, rejiaun ida ne'ebé nia (Lere) mós hola parte ba, uluk nia mak responsável máximu, iha Rejiaun Ponta Leste.
“Nia uluk militár, depois kuandu apartir 1981 mak saudozu sai hanesan kuadru polítiku, Sekretáriu Rejionál Ponta Leste nian to'o funu hotu, no ninia kontribuisaun no partisipasaun barak la halimar, susar, terus to'o ukun-aan”, haktuir Lere Anan Timur.
Nia hatutan, iha ukun-aan mos, saudozu asumi papél importante, iha konsellu veteranu nian, oinsá bele dezenvolve situasaun veteranus nian, lori sentimentu ida ne'e, ba Governu, atu bele valoriza veteranu sira nia moris.
“Nia kódigu ai-laran mak Renan-Selak, naran ida ne'e, komesa kedas husi baze apoiu to'o ohin loron, maibé nia naran sarani iha ai-laran, ami mós la hatene”, dehan Lere.