Tempotimor (Díli)- Sekretariu-Jerál organizasaun Persaudaraan Setia Hati Terate (PSHT), Pedro Aparício, husu ba Polísia Nasionál Timor-leste (PNTL), atu kaptura no investiga membru sira ne'ebé, ba sa'e sabuk, iha Atambua, Indonésia, tanba sira la kumpri regras ne'ebé Governu fó sai.
Maske iha ona rezolusaun Governu nian, hodi halo revogasaun ba rezolusaun Governu númeru 16/2017, 10 fulan Jullu, ne'ebé antes ne'e, suspende atividade Grupu Artemarsiais (GAM), hodi reativa arte-marsiál, maibé tenke priénxe rekezitu sira, hosi Komisaun Reguladora Arte-Marsiál (KRAM), atu hetan legalidade.
Tuir Nia, presiza halo investigasaun ba sira, tanba ba sa'e sabuk, laiha koñesimentu ba líder máximu organizasaun PSHT nian, no pior liu mak dadaun ne'e, Governu bandu hela artemarsiais atu hala'o atividade treinu, nomos situasaun agora Estadu Emerjénsia, ema labele tama sai iha fronteira, atu bele halo prevensaun ba moras Covid-19.
"Ba sa'e sabuk iha Indonésia, antes ne'e ami avizu ona, ba iha Munisípiu sira katak, Governu atu reativa labele lori estudante sira ba iha liur, segundu tanba Covid-19 ne'e, ne'ebé surat sira ne'e ami hato'o hotu ona, maibé ami lahatene sira ne'e, tanba laiha koñesimentu ba ami, ema seluk mak lori ba no ami mos lahatene", Pedro Aparício informa ba tempotimor.com via telefone, Kinta (10/09).
Nia dehan, membru hirak ne'ebé ba sa'e sabuk ne'e, laiha koñesimentu ba líder PSHT nian, tan ne'e konsidera sira hanesan grupu ki'ik ou individu ne'ebé ba Atambua, Indonésia ne'e Ilegal.
"Sira ba sa'e sabuk ne'e, la'os ami nia responsabilidade, tanba ne'e husu ba Governu no polísia sira tenke prosesa sira tuir Lei ne'ebé vigora, no sira mai tenke tama kuarentena, depois hotu tenke foti prosesu kriminál ida hasoru, tanba sira kontra lei Estadu nian", dehan Aparício
Molok ne'e, operasaun konjuntu entre Unidade Polísia Fronteira (UPF), Komandu Operasaun Espesiál (KOE), ho Falintil Forsa Defeza Timor-Leste (F-FDTL) konsege kaptura membru Arte-marsiál, husi organizasaun PSHT nain 37, iha fronteira Batugade no nain 14 iha Dili, Colmera.(*)