Saudozu nu'udár veteranu kombatente luta libertasaun nasionál Timor-Leste, tanba durante funu saudozu hatudu ninia brani tomak hodi luta hamutuk ho asuwa'in FALINTIL sira seluk ba libertasaun pátria.

“Governu sente lakon tanba foin mak harii konsellu veteranu, nia mós hanesan Vise-Prezidente Konsellu Veteranu nian, no ami la espera katak nia bele mate,” dehan Ministru Júlio Sarmento “Meta-Malik”, iha HNGV, Bidau, horisehik.

Meta-Malik lori naran MAKLN hato'o sira-nia sentidu kondolénsias profundu ba família matebian, tanba saudozu fila husi hela faluk no oan ki'ak sira.

“Ami prontu atu prepara kondisaun ba tau nia isin no lori ba nia uma, no akompaña nia isin ba to’o Lospalos,” dehan nia.

Kona-ba atensaun governu nian, Meta-Malik dehan, lalika preokupa, tanba governu iha rasik nia polítika atu responde ba situasaun sira hanesan ne'e, no governu nafatin fó apoiu ba família, tanba sira rasik mós ida-idak fó kontribuisaun ba rai ida ne'e.

“Ne'e duni governu sei tau konsiderasaun ba ida ne'e, tau atensaun ba nia família, pensaun ho buat sira ne'e hotu”, hatete nia.

Júlio hatutan, durante halo tratamentu iha HNGV, governu rasik halo ona preparasaun ba dokumentu sira hodi hein de'it aviaun atu lori ba Malázia.

“Mas derrepente nia mate, maibé tuir médiku sira katak nia ba mós la to'o Malázia. Tanba ne'e, importante mak Estadu, governu, família sei hamutuk hodi kontribui ba hakoi nia mate”, tenik nia. (*)