Angela Ikun Naruk, Konsidera Lere Fahi Fuik Tama Toos

Portavoz RNDJ-KRDTL Ángela Freitas ko'alia hela ho jornalista sira iha rezidénsia Formoza, Dili. (7/9) Portavoz RNDJ-KRDTL Ángela Freitas ko'alia hela ho jornalista sira iha rezidénsia Formoza, Dili. (7/9) Foto Tempo Timor

Tempotimor (Dili)-Portavoz grupu Rezistensia Nasional Defende Justisa no Konstituisaun RDTL (RNDJ-KRDTL) Angela Freitas hahú brani hodi ameasa fila fali Xefe Estadu Maior F-FDTL, Maijor Jeneral Lere Anan Timur.

Angela deklara sei hatoo keixa ba Ministériu Públiku (MP) relasiona ho deklarasaun Lere neebé hatete katak, Angela mak fó asesoria ba Alfredo Reinado Alves no Mauk Moruk neebé ikus mai rezulta ema nain rua nee mate.

"Dehan maijór Alfreido mate ne'e Angela mak envolve, ne'e la loos, tanba momentu ne'ebá lidera instituisaun F-FDTL ne'e la'ós Ángela, maibé atuál Primeiru Ministru Taur Matan Ruak, depois Mauk Moruk mate ne'e Jenerál Lere Anan Timur mak lidera F-FDTL, ne'ebé keta tuda fatuk subar liman no see mak lidera instituisaun F-FDTL ne'e tenke responsabliza ba mate sira ne'e," dehan Ángela iha nia rezidénsia Formoza, Dili, Segunda (07/09).

Angela mós hatan deklarasaun Lere neebé hatete katak, nia mak sai nuudar asesora ba Alfredo no Mauk Moruk.

"Jenerál Lere dehan ha'u mak asesora ba Alfredo no Mauk Moruk, ne'e la loos, tanba ne'e ha'u husu señor Lere tenke iha prova, nu'udar lideransa másimu iha F-FDTL, la'ós halo hanesan fahi fuik tama toos, se sente lidera F-FDTL kolen ona, haree ba futu manu, husik jerasaun foun mak lidera fali, tanba ne'e tempu badak ami sei lori jenerál Lere Anan Timur ba MP, agora ami-nia advogadu sira prepara hela faktu sira," nia dehan.

Tuir Ángela, deklarasaun ne'ebé durante ne'e Lere fó sai ba públiku laiha fundamentu no iresponsabilidade.

"Jenerál Lere nia deklarasaun ne'e laiha fundamentu no laiha responsabilidade nu'udar lideransa ne'ebé lidera instituisaun F-FDTL, tanba ne'e RNDJ-KRDTL prepara ona dokumentu sira hodi hatoo ba Ministériu Públiku, tanba ne'e para ona ho akuzasaun falsu sira ne'e," katak portavoz nee.(*)

Rate this item
(13 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.