Print this page

OJE 2021, Prioridade ba Setór Krusiál Lima

By September 04, 2020 3588
Diretór Jerál Ministériu Finansas Januário da Gama esplika hela ba jornalista sira kona-ba OJE 2021 nian. Sesta (4/9). Diretór Jerál Ministériu Finansas Januário da Gama esplika hela ba jornalista sira kona-ba OJE 2021 nian. Sesta (4/9). Foto Tempo Timor

Tempotimor (Dili)-Bazeia ba tetu Orsamentu Jerál Estadu (OJE) tinan fiskál 2021 ho montante billiaun $1.6, sei fó prioridade ba setór krusiál lima.

"Sesaun ida ohin halo ne'e bazeia ba aprovasaun husi Konsellu Ministru iha (2/9) ne'ebé KM aprova ona tetu agregadu ba 2021 ninian ho montante billiaun $1.6," dehan Diretór Jerál Finansas, Januário da Gama, iha edifísiu Ministériu Finansas, Aitarak-laran, Kinta (4/9).

Januário afirma, billiaun $1.6 ne'e halo ona kobertura despeza adisionál sira ba atividade rekuperasaun ekonomia ne'ebé kontribui husi ministeriu sira seluk para atinje objetivu no alvu sira ne'ebé VIII governu hatuur ona.

"Prioridade sira ne'ebé konsentra iha 2021 nian maka kapitál sosiál, dezenvolvimentu ekonomika ne'ebé enkaixa mós ho medida rekuperasaun ekonomia ninian, infraestrutura bázika no konetividade, dezenvolvimentu ambientál no setór instituisionál," nia esplika.

Husi apresiasaun sira ne'e, haree ba tetu OJE 2021 nian, aloka ba kategória sira ne'ebé VIII Governu Konstitusionál define ona.

Husi totál orsamentu ne'e distribui ba kategória saláriu no vensimentu tokon $216.2, bens servisu tokon $451.1, transferénsia públika tokon $480.7, kapitál dezenvolvimentu tokon $235.8, no kapitál menór tokon $6. Alende husi kategória sira ne'e, iha mós despeza ba Rejiaun Administrativa Espesiál Oekusse Ambeno (RAEOA) hamutuk tokon $127.

"Altura iha OJE 2020 nian ne'ebé aprezenta iha PN (mas) depois xumba, nune'e rekonsidera fila-fali iha tetu 2021 nian," nia tenik.

Entretantu, preparasaun governu nian ba OJE 2021 nian tempu limitadu, nune'e sei obriga ministériu hotu-hotu hodi buka tempu estra hanesan tempu férias no fin-de-semana para bele konklui preparasaun OJE 2021 nian ho di'ak no kumpre mós kalendáriu submisaun ba PN.

Preparasaun ba OJE 2021 nian husi Komite Revizaun Orsamentu Polítika (KROP) sei auguenta durante loron tolu para konsentra ba ministériu no instituisaun ne'ebé nia atividade kontribui ba rekuperasaun ekonomia. Maibé sira seluk ne'ebé fora husi ida ne'e, sei iha médida seluk atu halo verifikasaun no validasaun ba livru sira para orsamentu no materia sira ne'ebé aprezenta ba PN iha duni koerénsia. (*)

Rate this item
(0 votes)
Last modified on Friday, 04 September 2020 17:32
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items