Deputadu Bankada CNRT, Gabriel Soares hateten, Bankada CNRT rekoñese iha nasaun viziñu sira hanesan Indonézia no Austrália, kontinua hetan infesaun makaas husi moras Covid-19, maibé úniku iha Timor-Leste maka uza moras ne’e sai instrumentu polítika ba sira-nia interese.

Nia dehan, realidade hatudu osan Covid-19 ne'ebé uluk PN aprova mosu problema, governu ko’alia dehan fahe subsídiu front line, no subsídiu familiár mas rezultadu ema balun mak simu no balun abandonadu.

"Jestaun ba prevensaun Covid-19 sai hanesan instrumentu polítika governu nian no Prezidente Repúblika nian hodi asegura sira nia interese," tenik Gabriel, liu husi deklarasaun polítika, iha Plenária Estraordinária Parlamentu Nasionál, Kinta (3/9).

Sai duvida boot maka regra prevensaun ne'ebé durante ne'e Timor-Leste aplika governu la tau kondisaun, liuliu ekipamentu no rekursu hodi apoia kombate moras ne’e.

Tanba ne'e, Bankada CNRT sempre ko'alia fila-fila katak governu bele uza lei sistema saúde publika no sanitária, lei migrasaun azilu, no la presiza estende Estadu Emerjénsia.

Nia mós lamenta tanba agora Timor-Leste hasoru impase polítika, maibé dalan ne'ebé governu hili maka fulan-fulan aplika Estadu Emerjénsia, maski iha lei espesiál sira seluk atu kontrolu movimentasun sidadaun iha rai-laran no mós fronteira.

“Iha lei sira ne'ebé bele implementa sein prejudika ba dezenvolvimentu polítika iha rai-laran”, dehan Gabriel.

Ba kestaun ne'e Deputada Bankada KHUNTO, Olinda Guterres hateten, deputadu sira seluk maka lakohi apoiu planu governu, maibé bankada governu sira iha ne'e sei defende.

"Ha'u hakarak husu ba membru governu sira, imi lalika preokupa atu responde. Se ema lakohi vota afavór ami bankada governu iha sei vota afavór", dehan nia. (*)