Iha komunikadu imprensa ne'e sita katak, estadu emerjénsia ba dalimak sei hahú funsiona iha loron (5/9) Sábadu oras 00:00 to'o loron (4/10) Domingu iha oras 23:59.

"Estadu emerjénsia nu’udar médida prevensaun no kontrolu atu hases sidadaun hotu-hotu iha Timor-Leste husi kalamidade públika ne’ebé bele mosu husi COVID-19. Estadu tetu risku sira ne’ebé asosiadu ho SARS-CoV-2 ba Timor-Leste no médida ne’ebé tenke foti atu prevene importasaun moras husi rai-seluk, liu-liu husi nasaun ne’ebé iha relasaun besik liu ho Timor-Leste," dehan iha komunikadu husi Palásiu Prezidensiál.

Iha komunikadu ne'e mós sira katak, EE dalimak, estadu kontinua kontrola maka'as iha fronteira TL nian.

"Ba prevensaun no kontrolu ba COVID-19, Estadu sei tau atensaun espesiál ba ninia fronteira sira, hanesan pontu entrada mai territóriu nasionál no impoin kuarentena ba suspeitu ho infesaun no izolamentu ba ema hirak ne’ebé hetan moras no sai suspeitu. Ho medida sira ne’e mak sei bele proteje populasaun hotu-hotu. Lahó medidas hirak ne’e situasaun país ninian bele oin-seluk no potensialmente sai difísil liu," sita iha komunikadu.

Estadu foti medida sira ne’e atu proteje saúde públika, husi parte seluk, implementasaun estadu emerjénsia sei limite sidadaun ida-idak nia direitu no liberdade ne’ebé Konstituisaun garante.

Estadu emerjénsia ne’e sei parsialmente suspende no limita direitu ba sirkulasaun internasionál, liberdade sirkulasaun no fixasaun rezidénsia iha territóriu nasionál no mós direitu ba rezisténsia.

"Ohin, Parlamentu Nasionál aprova mensajen Prezidente Repúblika atu deklara estadu emerjénsia. Maibé molok haruka mensajen ba PN, PR rona uluk hanoin sira husi Konsellu Estadu no Konsellu Superior Defeza no Seguransa kona-ba pedidu renovasaun estadu emerjénsia husi governu," tenik iha komunikadu laran.

Governu nia pedidu ba renovasaun estadu emerjénsia tanba haree ba númeru kazu konfirmadu iha infesaun ho SARS-COV2, tuir dadus husi Organizasaun Saúde Mundiál, iha loron 25 agostu 2020, hamutuk liu 23 miloins no husi númeru ne’e hamate ona ema 800 mil mundialmente desde inísiu pandemia.

"Númeru kazu ho COVID-19 iha paises viziñu ho Timor-Leste, nomeadamente Indonézia no Austrália aumenta babeibeik. Iha Indonézia, ne’ebé Timor-Leste fahe nia fronteira terrestres rejista kazu hamutuk 155412 no iha Austrália hamutuk 24916, tuir dadus husi Organizasaun Saúde Mundiál. Tanba ne’e, renovasaun estadu emerjénsia nu’udar medida ida hodi prevene no kontrolu COVID-19 atu hases sidadaun hotu-hotu husi kalamidade públika," hakotu husi komunikadu imprensa ne'e.