Liuhusi diskusaun renovasaun Estadu Emerjénsia da lima, iha Plenária Estraordinária PN, deputadu Bankada KHUNTO, Luis Roberto, levanta kestaun ne'e atu governu bele hadi’a sira-ninia atendementu ba povu.
Tanba, nia haree povu nia preokupasaun kona-ba subsídiu front line ho subsídiu familiár kontinua sai problema. Nia dehan, subsídiu liña frente ba pesoál saúde, polisia, forsa, no mós familiariza barak maka reklama pagamentu.
Tuir loloos governu tenke rezolve tanba estrutura membru governu kompletu ona.
"Membru governu kompletu ona, tanbasá maka seidauk rezolve problema subsídiu front line, no mós subsídiu US$ 200 ne'e. Ita-nia povu agora preokupa mas tanbasá maka seidauk rezolve, tenke fó razaun fundamentál," dehan Luis, iha nia intervensaun, iha Plenária Estraordináriu PN, Kinta (3/9).
Nia afirma, governu tenke prontu ona atu rezolve ema sira ne'ebé servisu iha liña oin, no mós subsídiu familiár ne’ebé ema barak reklama.
Iha fatin hanesan, Deputada Bankada CNRT, Maria Fernanda Lay, husu ba governu atu haree kestaun kapasidade governu kona-ba oinsá atu rezolve subsídiu ba povu kbiit laek, inklui subsídiu liña frente nian. (*)