Tuir observasaun www.tempotimor.com iha terenu nota katak, militar sira haleu fatin sira besik Ángela Freitas nia uma ho armas kompleitu.
Angela deskonfia Major Jenerál Lere Anan Timur maka orienta membru F-FDTL sira halo kedas Embuskada iha fatin tolu besik nia residência no knua RDNJK.
Relasiona ho prezensa membru F-FDTL ne'e Ángela Freitas dehan, loloos forsa labele halo ameasa ba sidadaun baibain.
"Tuir informasaun katak sira atu halo kapturasaun maibé ita haree took. Tanba loloos ne'e militar labele halo ameasa sidadaun sivíl ne'ebé atu espresa sira-nia hanoin, tanba konsagra tiha ona iha Konstituisaun RDTL, tanba ne'e ameasa ba sidadaun sivíl ne'e krime," dehan Ángela Freitas ba jornalista sira via telefone, Tersa (01/09)
Ángela afirma, prontu koopera, bainhira ordem tun halo kapturasaun ba portavoz RNDJ-KRDTL ne’e.
"Ha'u agora dadaun laiha fatin, tanba sira konsentra iha ne'ebá dehan atu halo kapturasaun, ne'ebé karik halo kapturasaun ami sempre kopera, tanba ami la halo krime, tanba ita hotu akompaña katak durante ne'e ami halo buat sira ne'e tuir hotu prosesu, ne'ebé ami hetan ona legal husi PNTL para atu akompaña ami-nia manifestasaun," nia dehan