Deputadu Bankada FRETILIN, Francisco Branco, lori Parlamentu Nasionál nia naran husu ba Xefe Estadu Maiór Jenerál F-FDTL, Majór Jenerál Lere Anan Timur no Komandante Jerál PNTL, Komisáriu Faustino da Costa, atu esklarese ba públiku kona-ba membru sé loos Maka ba envolve grupu ne’e.
"Esklarese ba públiku loos duni ka lae membru F-FDTL no PNTL 'sorin balun' ba hamutuk ona ho grupu Ângela Freitas nian atu destabiliza situasaun," dehan nia, iha PN, Tersa (1/9).
Nia afirma, see ida ne'e maka loos, signifika sei elimina timoroan sira no atu halo funu hasoru Estadu RDTL ne'e hatudu, sidadaun Timor-Leste hothotu presiza atu iha edukasaun sívika, polítika patriótika atu hadomi rai doben ne'e, Nia husu, Estadu tomak tenke hola pozisaun no medida forte sira hasoru ema sira ne'ebé hakarak atu hakiak hahalok subversivu hasoru Estadu ida ne'ebé liu ema rihun atus rua mak lakon sira-nia vida atu harii.
"Bankada FRETILIN, PLP no KHUNTO hatete deklarasaun atu destabiliza situasaun seguransa rai-laran, uza elementu polisia ho militár sira atu elimina ka hakotu ema seluk nia vida até ameasa atu halo funu ne'e konstitui ona atu subversivu," tenik nia.
Relasiona ho kestaun ne'e, Bankada PLP, KHUNTO no FRETILIN apresia no louva komunikadu husi ierarkia Igreja Katólika Timor-Leste hodi rejeita informasaun dehan Igreja Katólika deskoñese no la hola parte iha movimentu ne'e. (*)