Print this page

Bele Halo Manifestasaun mas La’ós Hatún PR

By September 01, 2020 4529
Pe. Julio Crispin ko'alia hela ba média sira Pe. Julio Crispin ko'alia hela ba média sira Foto Tempo Timor

Tempotimor (Dili) - Relasiona grupu Rezisténsia Nasionál Defende Justisa no Konstituisaun (RNDJK) iha direitu manifestasaun, maibé labele hatún Prezidente Repúblika.

Jurista Timoroan Pé. Júlio Crispim hateten, bele iha direitu halo manifestasaun maibé hatún Prezidente Repúblika ne'e problema boot.

Tuir nia, halo manifestasaun ne'e direitu sidadaun nian bele halo. Maibé atu hatún Prezidente Repúblika maka sai kestaun, hili Xefe Estadu ne'e liu husi prosesu demokrátiku ka konstitusionál.

“Depois atu hatún (Prezidente Repúblika) ho fundamentu ladún klaru ba Prezidente Repúblika ne'e la'ós fasil ida," dehan Pé. Júlio ba www.tempotimor.com via telemovel, Segunda (31/8).

Nia akresenta, ema hotu iha direitu halo manifestasaun, importante mak labele halo estrundu no impata ema seluk nia direitu sirkulasaun.

"Agora atu ezije Prezidente tun ne'e iha nia regra, la’ós naranaran tun ho de’it ema ida-rua nia asaun. Prezidente Repúblika tun mós tenke tuir Lei Konstitusionál, a não ser nia moras ka nia rasik mak husu tun," dehan jurista ne’e.

Pé. Júlio realsa, membru FALINTIL-FDTL ho Polisia Nasionál Timor-Leste (PNTL) tenke asegura seguransa nasionál la’ós afilia fali ba interese ema balun nian tanba polítika.

"Membru FALINTIL-FDTL ho PNTL ne'ebé hola parte iha asaun hanesan ne'e iha nia regra interna atu prevé, sira tenke neutru iha asuntu sira hanesan ne'e. La’ós afilia ba ema ida ka rua nia vizaun ka ideia polítika. FALINTIL-FDTL ho Polisia tenke defende seguransa nasionál," dehan nia.

Entretantu, tuir karta ne'ebé lansa iha públiku liuhusi média sosiál, grupu RNDJK atu hamosu revolusaun funu hanesan dalan ba mudansa anti demokrátika iha Timor-Leste ho elimina hotu apoiante anti demokrátiku liuhusi forsa ho polisia ne'ebé apoiu ona movimentu ne’e. (*)

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items