Ne'e duni, Xefe Governu husu, lembra fali ba tempu pasadu Timor-Leste nia independénsia mai husi situasaun ne'ebé difisil, maibé konsege liberta duni pátria.

Nune'e sukat pasadu mai to'o agora la'o tempu naruk ona, maski buat barak mak halo ona, maibé barak mak seidauk. Tanba ne'e, presiza hotu-hotu ninia kontribuisaun para halo dezenvolvimentu hodi tane povu ba moris di'ak.

"Tinan 20 liu, hateke fali ba kotuk ita la'o dook loos ona, buat barak mak halo ona mas buat barak loos mak seidauk", dehan PM Taur, liu-husi ninia diskursu iha serimónia tomada de pose ba Komisáriu Funsaun Públika, iha Palásiu Governu, Sesta (28/08).

Nune'e, espera iha tempu sira ne'ebé oin mai hotu-hotu fo nafatin kontribuisaun para nasaun la'o nafatin ba oin ho dezenvolvimentu ekonómiku no seguransa estabilidade.

"Dezenvolvimentu liuliu buka bem estar sidadaun sira-nian, tanba ita-nia atensaun no fokus tomak mak ba sidadaun sira", tenik nia.

Tanba ne'e, xefe ezekutivu husu hotu-hotu nia kontribuisaun atu lori nasaun Timor-Leste ba oin ho dezenvolvimentu iha área oioin. (*)