"Ba populasaun tomak ne'ebé eskolla ona ita-nia loron boot ne'e, ne'ebé determina ukun-aan ba ita-nia rai, husu ba ita hotu para kontinua halo reflesaun kona-ba di'ak saida mak ita halo ona ba ita-nia rai no saida mak ita seidauk halo," dehan Primeiru Ministru, Taur Matan Ruak, ba jornalista sira iha Palásiu Prezidensiál, Kinta (27/08).
Xefe governu ne'e akresenta, buat sira ne'ebé seidauk halo ne'e sei boot barak liu ida ne'ebé ita halo ona, tanba ne'e prepara aan nafatin, halibur kbiit hotu, matenek, esforsu hotu para dezenvolve nasaun ne’e.
Husi mensajen PM nian ne'e atu reflete ba sidadaun hotu katak hela iha uma no halo reflesaun, tanba tinan 21 Konsulta Populár ne'e governu deside ona sei la halo atividade komemorasaun ba loron istóriku ne’e tanba orsamentu laiha.
"Ita la realiza selebrasaun sira, tanba iha tempu orsamentu duadésimu ne'e Ministériu Administrasaun Estatál (MAE) laiha orsamentu hodi realiza 30 Agostu iha nasionál inklui munisípiu," dehan Ministru Administrasaun Estatál Miguel Pereira de Carvalho. (*)