Tempotimor (Dili) – Vise-Prezidente Parlamentu Nasionál (PN), Luís Roberto da Silva, husu ba Governu atu presiza kria desizaun polítika oinsá mak fasilita estudante sira iha rai-laran.

Kona-ba osan subsídiu ba estudante iha rai-liur no rai-laran, nia dehan, molok ne'e Parlamentu Nasionál aprova ona osan ba ida ne'e.

Ho subsídiu ne'e nia konsidera governu hamosu diskriminasaun, tanba estudante sira iha diretu hanesan maibé fó subsídiu de’it ba rai-li'ur no la fó ba estudante sira iha rai-laran.

Ne’e duni, nia fó hanoin ba governu tenke haree hotu ba estudante iha rai-laran tanba estudante sira iha rai-laran maioria foho oan no mai hela iha sidade maka eskola, entaun sira iha diretu asesu ba subsídiu husi governu.

"Relasiona ho subsídiu ne'ebé distribui ba ita-nia estudante sira rai-laran no rai-li’ur, iha momentu ne'e parlamentu aprova ona orsamentu tokon US$ 150 ba fundu Covid-19. Ho osan ida ne'e maka governu ezekuta balun hodi responde ba ita-nia estudante sira naun bolseiru no bolseiru sira iha rai-li’ur," deklara Visé Prezidente PN, ba jornalista iha PN, Kuarta (26/8).

Roberto hatutan, parlamentu husu nafatin ba iha governu hodi haree, tanba enkuantu sira mós husi foho mak mai iha sidade kapitál Dili, entaun presiza mós orsamentu ba ida ne'e.

Molok ne'e, Prezidente Parlamentu Nasionál (PN), Aniceto Guterres, mós promete sei tatoli Ba governu kona-ba preokupasaun subsídiu ba estudante rai-laran. (*)