Liga ba asunte refere, Ministra MNEK Adalzija Magno katak, ekipa deklegasaun husi MNEK mai relata servisu no preprasaun hotu ba PR Lú-Olo.
“Ohin, Ami mai para hetan brifeen ida kona-ba prepasaun adezaun Timor-Leste nian ba Asean. Entaun imi hotu hatene katak fulan oin sei iha telekonferénsia ida entre TL ho ekipa assessment ne’ebé mak sira atu halo entrevista kona-ba ita-nia preprasaun ba pilár rua restu hanesan sósiu-kulturál no ekonómiku,” dehan Ministra MNEK Adalzija Magno ba jornalista sira iha Palásiu Prezidensiál bairru-pite, Sesta (21/08)
Governante ne’e dehan, ekipa assessment ne’ebé atu halo entrevista ba pilár rua seluk TL nian mak pilár sósiu-kulturál ne’ebé sei hala’o iha fulan Setembru no pilár ekonómiku ne’ebé sei hala’o iha fulan Outubru 2020.
Nia mós dehan, preparsaun TL nian hodi sai membru ba Asean la’ós MNEK mesak, maibé iha liña miniteriál hotu nian servisu.
“Preparasaun ne’e la’ós ami mesak, maibé iha liña ministeriál oioin, kuaze ministériu hotu iha ita-nia governu agora ne’e involve hotu, maibé ami mak hanesan koordenadór entaun ami mai aprezenta ba señor Prezidente Repúblika,” nia dehan.
Ministra ne’e afirma, TL presiza prepara aan halo didi’ak iha parte pilár ekonómia nian.
“Ita presiza hadi’a liu-liu iha pilár ekonomia ne’ebé ita tenke ser prepara ita-nia aan, oinsá ita nakloke ba investimentu, ite tenke diversifika ita-nia ekonomia, oinsá mak ita prepara ita-nia aan para proteje ita-nia rai, oinsá ita halo komérsiu ho ema, ita halo free trade agreement. Entaun sasán sira ne’e mak ami relata ba PR,” Adalzija relata.
Pursentu TL atu sai membru ba Asean seidauk bele ko’alia tanba iha pilár rua kedas mak seidauk avalia, purtantu defende ba avaliasaun ne’ebé mak ekipa assessment halo.
"Ein prinsípiu ita optimista katak sasán la’o di’ak, maibé ita tenke hadi’a maka’as mak iha ita-nia pilár ekonomia nian, presiza hadi’a ita-nia aan, hanesan hadi’a lejislasaun sira, nakloke aan investor sira depois iha lejislasaun seluk hanesan lei de investimentu, lei rai no sasán sira seluk tan presiza haree,” Ministra dehan