Ne’e duni, husu ba lider veteranu sira hanesan Kay Rala Xanana Gusmão, Taur Matan Ruak no Francisco Guterres Lú Olo atu lolo liman ba malu hodi hateke ba dezenvolvimentu nasionál.
Mensajen ne'e Jenerál Lere hato'o bainhira halo diskursu iha Selebrasaun loron FALINTIL ba dala XL ne'ebé realiza, iha Kuartél Jerál, FALINTIL-FDTL, Fatuhada, Dili, Kinta (20/8).
PUBLISIDADE HUSI MOP FO PARABENS BA LORON FALINTIL
"Ita restaura independénsia hahú ukun aan, la'ós ema seluk-ema leet maka ukun rai ida ne'e, ita-nia ukun na’in sira hothotu mai husi rezisténsia, tantu frente armada no frente diplomátika sira ne'e mak kaer destinu rai ida ne'e nian, maibé ita haree katak dezenvolvimentu rai ida ne'e nian la’o hanesan ne'e de'it, ita hasoru mak impase polítika no krize, la’ós dezenvolvimentu nasionál," dehan Lere.
Lere akresenta liu tan,relasaun entre lider sida ohin loron la hanesan uluk ona, uluk luta iha ai-laran relasaun entre lider sira la'o armonia, iha domin, han no toba hamutuk.
“Haree ba kotuk ita-nia perkursu tinan 24 iha ai laran, imi-nia komportamentu, relasaun, domin ba malu ne'e oinsá. Uluk iha ai-laran espelentis rusa nian, naan maran, nuu maran ka ita la hewai malu, ita hamutuk no toba hamutuk, terus hamutuk mai ohin loron ita haree situasaun ne'e oin seluk ona," tenik nia ho triste.
Lere hatutan, entre lider sira daudaun ne'e laiha armonia ba malu, dook malu. Maibé karik iha kotuk hasoru malu nia hanesan ema ki'ik la hatene.
"Ami haree katak lider sira-nian iha planu interna ladún armoniozu, ami haree katak sira dodok malu hela, iha kotuk sira hasoru malu hela karik ne'e sira nia segredu, nu'udar ita kiik ami la hatene," dehan Lere. (*)