Print this page

Governu Xina Prontu Hamutuk Ho TL Kombate Covid-19

By August 18, 2020 1490
Embaixadór Republika Populár Xina Xiao Jianguo ko'alia hela ho jornalista sira iha tempu balun liubá. Embaixadór Republika Populár Xina Xiao Jianguo ko'alia hela ho jornalista sira iha tempu balun liubá. Foto Tempo Timor

Tempotimor (Dili) - Governu Xina liuhusi nia Embaixada iha Timor-Leste (TL), nafatin hato'o sira-nia prontidaun hodi fó apoiu ba povu Timor-Leste (TL) hodi kombate pandemia Covid-19.

Embaixadór Xina iha TL, Xiao Jiangou hatete, governu Xina prontu hamriik iha TL nia kotuk hodi halo prevensaun ba pandemia Covid-19 iha Timor-Leste.

Nia hatete, antes ne'e ho kooperasaun nasaun rua hodi halo servisu lubuk ida, liuliu kooperasaun iha área prevensaun ba moras Covid-19 nia liuhusi distribuisaun materiál prevensaun sira hanesan maskra no seluk tan.

"Ami husi Xina nafatin iha kometimentu atu kombate Covid-19 iha Timor-Leste", hatete Embaixadór Xina, Xiao Jiangou, ba jornalista sira hafoin ensera enkontru ho Vise-PM no MSSI, Armanda Berta dos Santos, iha Kaikoli, Segunda (17/08).

Nia hatutan, pandemia Covid-19 sai nu’udár problema mundiál ne'ebé nasaun tomak enfrenta, tanba ne'e maka Xina nafatin sai hanesan suporte ba TL hodi servisu hamutuk ba prevensaun Covid-19.

Nia dehan, governu TL no Xina iha kooperasaun ne'ebé di'ak iha kombate Covid-19, tanba atu kombate Covid-19 presiza iha servisu hamutuk no mós iha kooperasaun internasionál nian.

"Timor-Leste hanesan nasaun ne'ebé ki'ikoan, tanba ne'e Xina nafatin hamriik iha Timor-Leste nia sorin hodi haree ba problema mundiál ne'ebé oras ne'e mundu enfrenta," dehan nia.

Embaixadór mós informa, enkontru ne'ebé sira hala'o ko’alia mós kona-ba atu estabelese solidariedade ida ne'ebé di'ak liután, nasaun rua tenke hametin nafatin kooperasaun ba malu. (*)

Rate this item
(0 votes)
Last modified on Tuesday, 18 August 2020 07:49
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items