Tuir definisaun, alozamentu ka ho termu Indonezia bolu akomodasi nu’udar osan ne’ebé oferese ba ema ida hodi fasilita ema refere toba iha otel ka pouzada bainhira nia hala’o viajen.
Prezidente PN Aniceto Guterres hatete, deputadu sira kada fulan simu orsamentu ba alozamentu $450, bainhira soma hamutuk, kada tinan deputadu ida hetan osan alozamentu $5,400.
"Ita-boot sira hakarak hatene, kada fulan deputadu ida simu osan subsídiu alozamentu hamutuk $450, entaun tinan ida, deputadu ida simu subsídiu alozamentu hamutuk $5,400. Agora deputadu hamutuk 65 ne'e kada tinan gasta osan hira?, ne'ebé husu ba sosiedade sivíl sira hakarak krítika ne'e, kritika buat sira ne'e par ita bele diskuti," dehan Aniceto ba jornalista sira hafoin enkontru ho Prezidente Repúblika (PR) Francisco Guterres Lú Olo, Segunda (17/08).
Tuir Aniceto, maske deputadu sira iha no hela ona iha uma ne’ebé di’ak, maibé sira sei kontinua simu subsidiu ba alozamentu.
"Osan ne'e nia ba gasta duni ka lae, balun nia iha uma di'ak mós nia simu nafatin, tanba ne'e subsídiu," dehan Aniceto.
Tanba deputadu sira simu subsídiu alozamentu ne'ebé boot, Aniceto dehan, PN planeia atu harii uma ba deputadu sira hodi bele hasai subsidiu refere.
"Se deputadu ida simu subsídiu alozamentu hamutuk rihun $5,400 mak vezes ho deputadu 65 ne'e hira? Hamutuk $351,000 kada tinan, entaun husi tinan lima nian ne'e de'it bele halo uma ona. Tanba ne'e mak PN iha vizaun katak halo uma naton ba deputadu sira ne'ebé mai husi foho mak uma laiha, sira bele hela iha ne'ebá par poupa osan," nia dehan.